Sliema Wanderers kisbu t-tieni rebħa kosnekuttiva meta għelbu lil Balzan bl-iskor ta’ 2-0, biż-żewġ goals għalihom jaslu wieħed f’kull taqsima. Din il-partita li intlagħbet fit-Tony Bezzina Stadium ġabet fit-tmiema t-tieni ġurnata tat-360 Sport Malta Premier.
Kien biss fis-17-il minuta li waslet l-ewwel azzjoni denja ta’ nota, bil-Wanderers ikunu huma li joħolqu l-periklu meta l-captain Henrique Murilo kellu xutt mill-ewwel minn ġol-kaxxa li ntemm ftit għoli.
Dan sabiex man-nofsiegħa freekick insidjuż ta’ Steve Pisuni dejjem għall-Wanderers ġie mdawwar f’corner bi bravura mill-goalkeeper ta’ Balzan Danilo Golovic. Mill-corner li rriżulta mogħti minn Pisani, Jonata De Oliveira Bastos kellu d-daqqa ta’ ras tiegħu li ntemmet ftit barra.
Sliema fetħu l-iskor fis-37 minuta meta STEVE PISANI rċieva l-assist mix-xellug u permezz ta’ xutt fil-baxx minn ġol-kaxxa, għeleb lil Golovic.
Balzan wieġbu pemezz ta’ xutt angolat ta’ Udoyen Akpan mil-lemin li ġie salvat mill-goalkeeper tal-Wanderers, Emeka Kelvin Agu, żewġ minuti minn tmeim l-ewwel taqsima.
Ħames minuti mill-ftuħ tat-tieni taqsima, Isaac Westendorf għal Balzan kellu d-daqqa ta’ ras tiegħu li ntemmet ftit barra wara li rċieva cross mil-lemin mingħand Nikola Zerjal.
Sliema wieġbu permezz ta’ cross ta’ Jonata mix-xellug li minnu Gustavo Alcino kellu d-daqqa ta’ ras tiegħu tintemm barra fl-64 minuta. Żewġ minuti biss wara cross-shot ta’ Jonatan mil-lemin ġie salvat minn Golovic. Dan sabiex l-istess goalkeeper ta’ Balzan reġa’ wettaq save tajjeb ieħor fuq freekick ta’ Steve Pisani fil-71 minuta hekk kif il-Blues baqgħu fil-kontroll tal-partita. F’kontarttakk veloċi għal Balzan fit-73 minuta, Udyen Akpan irċieva tajjeb minn through pass fuq ix-xellug iżda x-xutt angulat tiegħu intemm ftit barra.
Fit-88 minuta Sliema resqu viċin li jirdoppjaw l-iskor meta s-sostitut Samuel Gomes Da Mata temm azzjoni tajba permezz ta’ xutt fil-baxx minn tarf il-kaxxa li ġie parzjalment salvat minn Golovic, b’Mohamed Awad jitfa’ ġewwa iżda l-goal tħassar minħabba offside.
Madankollu Sliema irnexxielhom jissiġillaw ir-rebħa permezz tat-tieni goal fit-92 minuta meta SAMUEL GOMES DA MATA rċieva l-assist mix-xellug u wiċċ imb’wiċċ mal-goalkeeper Golovic ma ħafirx.
Referee: Philip Farrugia
Plejer tal-Logħba: Steve Pisani (Sliema W.)
