Il-Gvern permezz tal-Ministeru għall-Inklużjoni u l-Kwalità tal-Ħajja ħabbar skema ġdida ta’ għotjiet żgħar lill-Għaqdiet Volontarji u Kunsilli Lokali.
Din l-iskema se tiswa mitt elf ewro u l-flus se jmorru għal dawk li se jimplimentaw fil-prattika proġetti u inizjattivi fl-ispirtu tal-Istrateġija Nazzjonali ta’ Malta għas-snin elfejn wieħed u għoxrin u l-elfejn u tletin dwar id-Drittijiet ta’ Persuni b’Diżabilità li tħabbret din il-ġimgħa.
Il-Ministru għall-Inklużjoni Julia Farrugia Portelli qalet li din l-iskema hija waħda prattika, fejn fil-qofol tagħha hemm aktar għarfien dwar il-persuni b’diżabilità.
Spegat, “Biex din l-istrateġija tirnexxi jrid ikollna poplu wieħed magħqud u jkollna għarfien dwar id-diżabilità inġenerali. Allura din l-iskema ta’ €100,000 se tkun qegħda tara li l-partijiet ikkonċernati, il-kunsilli lokali, għaqdiet mhux governattivi jibgħatu messaġġ b’saħħtu li bil-proġetti li huma jistgħu jagħmlu fil-komunità verament aħna qegħdin niġbdu ħabel wieħed f’dan il-pajjiż.”
Is-Segretarju Permanenti fi ħdan il-Ministeru għall-Inklużjoni spjega kif din l-iskema hija maqsuma fuq erba’ kategoriji.
Qal, “L-erba’ kategoriji ta’ din l-iskema huma tnejn dwar l-għarfien u tnejn dwar proġetti li jinkorraġixxu l-partiċipazzjoni tal-persuni b’diżabilità. Fiż-żewġ kategoriji qed naraw, fejn qed ninkorraġixxu aktar l-għarfien, kemm bl-involviment dirett tal-persuni b’diżabilità, mela huma stess qed imexxu l-proġett. Filwaqt li minn naħa l-oħra jkollok persuni b’diżabiltà li qed jaħdmu ma’ entitajiet differenti.”
Intqal kif il-massimu fondi li għaqda jew Kunsill Lokali jista’ jgawdu huwa ta’ ħamest elef ewro u wieħed jista’ japplika sal-ewwel ġurnata ta’ Novembru.
