Imħeġġa minn stħarriġ b’saħħtu tal-Awtorità tax-Xandir ftit tal-jiem ilu fl-istazzjonijiet ONE jeżisti entużjamu liema bħalu għall-iskeda tal-Ħarifa. Se jkun hemm 45 programm li se jiddevertu u jinfurmaw lit-telespettaturi u dan b’xandir HD hekk kif qed tinkiteb paġna ġdida fl-istorja tal-istazzjon. L-iskeda tal-ħarifa se tkun ippreżentata fi programm spejċali l-ħadd fil-ħamsa u nofs ta’ wara nofsinhar. Fejn żgur se tkun evidenti l-emfasi fuq programmi ta’ ġrajjiet kurrenti.
Fosthom programmi ta’ kuljum bħal One News Breakfast filgħodu u Pjazza qabel il-bulettin tas-sebgħa u nofs bi preżentazzjoni ta’ Karl Stagno Navarra. Iż-żewġ programmi għandhom produzzjoni tal-Kamra tal-Aħbarijiet, bħal m’għandu l-programm ONE WEEK li l-ġimgħa filgħaxija jiddiskuti l-avvenimenti ewlenin tas-seba tijiem ta’ qabel, bi preżentazzjoni ta’ Janice Bartolo. Luke u Glenn, se jkunu mat-telespettaturi kull nhar ta’ Tnejn filgħaxija bi programm intelliġenti, niggieżi u kultant satiriku. Filwaqt li Arena, immexxi minn Ramona Attard, jibqa’ l-programm ewlieni ta’ diskussjoni kull nhar ta’ Erbgħa. Iżda, l-iskeda toffri iktar minn hekk.
L-istazzjon għandu għażla ta’ Drama mill-aqwa, fosthom is-sitcom Dotttoressa Whatever , Division 7 u Redlands . Ta’ kuljum fil-tlieta u nofs ta’ wara nofsinhar se tkompli is-soap opera Tereza, illum appuntament għal eluf ta’ Maltin.
Filwaqt li l-Ħadd filgħaxija se jixxandar Klassi Ghalina segwit minn IL-PATT. Ta’ kuljum se jixxandru numru ta’ magazine programmes, t’informazzjoni u ta’ diskussjoni, bħal Kalamita. Jibqgħu ukoll Ilsien in-Nisa, Arani Issa u Aroma Kitchen . U ma jonqsux l-anqas l-aġġornamenti sportivi. Dawn ilkoll programmi li wieħed jista’ jara live jew ondemand fuq one.com.mt.
