Fit-tieni partita tas-Sibt wara nofsinhar fit-Tony Bezzina Stadium, Gżira United urew is-saħħa tagħhom meta kontra Pieta rebħu b’mod konvinċenti bl-skor ta’ 6 – 0 .
Il-Maroons fetħu l-iskor proprju fl-ewwel periklu li ħolqu fis-sitt minuta meta wara li rċieva minn korner ta’ Steve Pisani, Jefferson De Assis, minn daqqa ta’ ras mill-viċin tefa’ l-ballun f’lasta vojta.
Gżira rduppjaw l-iskor fil-45 minuta meta Toni Kolega kellu xutt minn tarf il-kaxxa li ntemm wara l-goalkeeper ta’ Pietá, Simone Moschini, bil-ballun jaħbat mal-mimduda qabel intemm ġewwa.
Fil-ftuħ tat-tieni taqsima Gżira komplew bl-istess ritmu tal-ewwel waħda u fl-54 minuta għamluhom tlieta meta l-captain Nikolai Muscat indirizza through pass lejn Jefferson De Assis li wiċċ imb’wiċċ mal-goalkeeper ta’ Pietá, Moschini, tefa’ ġewwa.
Kulma jmur kompla d-dominju assolut tal-Maroons u fit-58 minuta wara li rċieva minn kross ta’ Andy Borg, Maxuell Maia, mill-viċin tefa’ ġewwa.
Huma skorjaw il-ħames goal fit-68 minuta permezz ta’ xutt mill-isbaħ minn barra l-kaxxa ta’ Thiago Espindola li ma ta l-ebda ċans lil Moschini.
Gżira ssiġillaw ir-rebħa permezz tas-sitt goal fl-84 minuta meta wara li rċieva minn kross mil-lemin, Jefferson De Assis, kien fil-post it-tajjeb fil-mument opportun u b’xamma kbira għall-goal mill-viċin tefa’ ġewwa.
Referee:- Alex Johnson
Player tal-Logħba: Jefferson De Assis
