Fl-aħħar sigħat irriżultaw sitt persuni oħra fil-pożittiv għall-COVID-19 minn 993 test.
Fost dawk infettati hemm tarbija ta’ xahar.
F’konferenza tal-aħbarijiet, is-Supretendent tas-Saħħa Pubblika, il-Professur Charmaine Gauci qalet li fis-sebgħa t’April, it-tarbija bdiet bis-sintomi ta’ sogħla u qtugħ ta’ nifs. L-awtoritajiet tas-saħħa qegħin jintraċċaw il-persuni li kellhom kuntatt mat-tarbija fosthom il-qraba u l-istaff mediku.
Każ ieħor huwa ta’ mara ta’ sebgħa u ħamsin sena li rriżultat pożittiv għall-coronavirus wara li sarilha test ta’ rutina, hekk kif daħlet l-isptar Mater Dei biex tagħmel operazzjoni. L-aħħar li marret għax-xogħol kien fis-sbatax ta’ Marzu.
Raġel ta’ sitta u ħamsin sena ukoll ġie infettat bil-virus. Il-Professur Charmaine Gauci qalet li ma kellux kuntatt mal-pazjenti oħra, iżda l-awtoritajiet tas-saħħa qed jintraċċaw lill-kollegi tiegħu.
Pensjonant ta’ tlieta u sittin sena ukoll ġie infettat. Huwa beda bis-sintomi fl-erbgħa ta’ April. Huwa jinsab fi stat tajjeb ta’ saħħa.
Mara ta’ sebgħa u erbgħin sena ġiet pożittiva għall-virus wara li żviluppawlha s-sintomi fis-sitta ta’ April fosthom uġigħ fil-jogi u fil-widnejn.
Dawn il-każijiet kienu kollha minn trasmissjoni lokali.
L-unika każ impurtat huwa dak ta’ raġel ta’ tnejn u ħamsin sena li rriżulta pożittiv wara li wasal Malta mir-Renju Unit fit-tnejn ta’ April u beda bis-sintomi tliet t’ijiem wara.
Il-Professur Gauci qalet li fost il-każijiet pożittivi sal-lum kien hemm każ ieħor ta’ ħaddiem ta’ supermarket iżda l-ħaddiem kien jaħdem f’maħżen.
Dwar l-isptar Mater Dei, il-Professur Gauci qalet li qegħdin jittieħdu l-miżuri biex dan jinżamm sigur u għalhekk wieħed xorta għandu jfittex il-kura jekk jeħtieġ.
“Il-mard l-ieħor ma waqafx. Min għandu mard tal-qalb jew respiratorja, l-isptar tagħna qsamnih Covid u non covid area. Min għandu bżonn jiġi l-isptar jiġi għax is-sitwazzjonijiet jistgħu jkunu gravi.” Stqarret il-Prof. Gauci.
Il-Professur Gauci kompliet tappella għall-koperazzjoni tal-pubbliku.
Hi kompliet tgħid, “Dawn in-numri ma jfissru xejn imbilli illum kellna numru żghir. Aħna għadna telgħin il-fuq. Hawn team kbir jaħdem biex aħna ngħinuk. Għandna bżonn il koperazzjoni tagħhkom mela intom għinuna.”
Intant ma jeżisti l-ebda każ ta’ residenti infettati bil-Coronavirus fid-djar tal-anzjani.
F’konferenza tal-aħbarijiet, il-Ministru għall-Familja u s-Solidarjetà Soċjali Michael Falzon iddikjara li ma hemm l-ebda każ ta’ Coronavirus fl-isptar San Vinċenz de Paule.
Minn tagħrif li kiseb ONE News, il-persuna infettata li ssemmiet ilbieraħ fil-fatt ma kinitx residenti fi djar tal-anzjani iżda kienet f’sala parti mill-isptar ġenerali t’Għawdex.
Nifhmu li ttieħdu l-prekawzjonijiet kollha fis-sala Sant’Anna li hi parti mill-isptar fir-Rabat Għawdex.
