Naxxar Lions kisbu rebħa tajba ta’ 4-2 fuq Gudja United biex komplew jitbegħdu miz-zona tar-relegation bl-eroj taghhom ikun l-attakkant Pablo Augusto Servo de Carvalho li skorja hat-trick.
Naxxar Lions fetħu tajjeb fuq l-attakk u ħadu kmand assolut tant li sat-18-il minuta kienu diga’ 3-0 minn fuq.
Huma fetħu l-iskor wara seba’ minuti meta Robinson Blandon approfitta ruħu minn żball fid-difiża ta’ Gudja, daħal fil-kaxxa u għadda l-ballun lil Pablo Augusto Servo de Carvalho li ma kellux diffikulta’ jiddepożita l-ballun fix-xibka.
L-istess Servo de Carvalho rdoppja fl-14-il minuta meta kkontrolla tajjeb qabel spara l-ballun fix-xibka minn qagħda angolata.
Fis-16-il minuta Gudja resqu qrib permezz ta’ Gianluca Zammit li x-xutt tiegħu għadda ftit barra.
Iżda żewġ minuti biss wara l-iskor sar 3-0 minn kontrattakk veloci tal-Lions li spiċċa b’Robinson Rendon Blandon jiskorja minn qagħda tajba.
Gudja naqqsu l-marġini fil-21 minuta meta Gianluca Zammit skorja b’xutt minn tarf il-kaxxa.
Il-logħba naqqset ħafna mir-ritmu wara dawn l-erba’ goals biex sa l-intervall ma kien hemm ebda azzjoni oħra denja ta’ nota.
Fit-tieni taqsima Naxxar dehru aktar moħhom illi jikkontrollaw il-vantaġġ li kellhom, iżda fis-60 minuta Gudja rnexxielhom jerggħu jiskurjaw permezz tal-captain Matias Muchardi biex fetħu tamiet li jistgħu jsalvaw ir-riżultat.
Min-naħa tagħhom, Naxxar resqu qrib fit-68 minuta meta minn corner mogħti minn Moreira de Souza, Takuma Yamaguchi ttanta xortiħ b’xutt angolat li għadda tul il-lasta u spiċċa barra.
Naxxar serrħu rashom mir-rebħa proprju fid-90 minuta meta Robinson Blandon ikkombina tajjeb ma’ Pablo Augusto Servo de Carvalho li mill-qrib ma kellux diffikulta’ jitfa’ l-ballun fix-xibka biex jgħaqqad il-hat-trick.
Referee: Glen Tonna
BOV Plejer tal-Logħba: Pablo Augusto Servo de Carvalho (Naxxar L.)
