Heritage Malta nediet sit elettroniku ġdid www.maltashipgraffiti.org. Dan is-sit hu maħsub u mfassal biex isolvi l-misteri tal-graffiti storiċi li nsibu f’Malta u li juru bastimenti.
Maltashipgraffiti.org hija l-frott ta’ riċerka estensiva, dokumentazzjoni metikoluża u passjoni kbira għall-preservazzjoni ta’ aspett mhux magħruf wisq tal-istorja marittima tagħna.
Is-sit elettroniku jservi kemm bħala arkivju diġitali kif ukoll bħala riżorsa edukattiva, fejn kemm storiċi bi sfond akkademiku u kif ukoll membri tal-pubbliku ġenerali jsibu opportunità bla preċedent biex jimirħu fid-dinja intriganti tal-graffiti tal-bastimenti u jippruvaw jifhmuha.
Is-sit elettroniku jinkorpora kollezzjoni vasta ta’ ritratti, deskrizzjonijiet dettaljati u kuntest storiku għal bosta graffiti ta’ bastimenti skoperti fil-Gżejjer Maltin. Min jidħol fis-sit jista’ jfittex, iqalleb u jeżamina dawn l-artefatti mhux tas-soltu, u jagħti ħarsa lejn il-ħajja ta’ dawk li ħallew il-marka tagħhom billi naqqxu stampi ta’ bċejjeċ tal-baħar.
Maltashipgraffiti.org joffri wkoll suġġerimenti dwar dawriet bil-mixi li wieħed jista’ jagħmel fi bliet u rħula Maltin u li matulhom jista’ jara binjiet imżejnin bi graffiti ta’ bastimenti u jeżamina d-dettalji tal-istampi mnaqqxin biex japprezza l-ħila ta’ min għamilhom u l-istejjer warajhom.
Dawk li jidħlu fis-sit elettroniku jistgħu jaqsmu dak li jafu jew li skoprew u jieħdu sehem f’diskussjonijiet biex ikompli joktor l-apprezzament kollettiv tal-graffiti tal-bastimenti.
