Triq ir-Repubblika fil-Belt Valletta qed tingħata dehra ġdida grazzi għall-installazzjoni ta’ dwal ġodda li qed tagħmel l-Enemalta b’investiment ta’ €350,000.
Dan l-investiment hu mmirat biex idawwal din it-triq prinċipali fil-kapitali b’mod aħjar u aktar effiċjenti billi jinbidlu d-dwal qodma li kien ilhom jintużaw għal ħafna snin.
B’kollaborazzjoni bejn il-Kunsill Lokali tal-Belt Valletta u l-Enemalta, skatta l-proċess biex din is-sistema tinbidel f’waħda aktar moderna u effiċjenti, li tikkonsma inqas enerġija u ddawwal aħjar.
F’din l-ewwel fażi, mit-Teatru Rjal sa Pjazza San Ġorġ, il-ħaddiema tal-Enemalta installaw 125 lampa tal-aħħar teknoloġija maż-żewġ naħat tat-triq.
Sadanittant bħalissa għaddej ix-xogħol għat-tieni fażi ta’ dan il-proġett biex il-qawwa ta’ dan id-dawl tkun tista’ tiġi kkontrollata u mibdula skont il-ħtieġa, b’mod awtomatiku.
Waqt żjara flimkien mal-membri tal-Kunsill Lokali, il-Ministru għall-Ambjent, l-Enerġija u l-Intrapriża, Miriam Dalli, esprimiet is-sodisfazzjoni tagħha għall-implimentazzjoni ta’ dan il-proġett.
Qalet, “Permezz ta’ dawl apposta, li jaħli ħafna inqas u jagħti dehra isbaħ, qed joħroġ il-wirt tal-Belt. Aktar fażijiet tal-proġett se jkomplu, fosthom id-dawl mad-dawra tal-Belt Valletta.”
Is-Sindku tal-Belt Valletta, Alfred Zammit, qal li jinsab sodisfatt li proposta li ressaq il-Kunsill Lokali tal-Belt biex il-kapitali tingħata dehra ġdida, b’sistema ta’ dwal ġdida, qed titwettaq.
Qal, “Dan il-proġett professjonali li issa se jitgawda b’dawl li se jixgħel it-triq u l-bini storiku li għandha l-Belt storika tagħna.”
Il-Maniġer tad-Diviżjoni responsabbli mid-dwal tat-toroq fl-Enemalta, l-Inġinier Norman Zammit qal li dan il-proġett hu maħsub li jagħti valur miżjud lill-kapitali ta’ pajjiżna permezz tal-użu ta’ teknoloġiji li jtejbu l-effiċjenza fil-konsum tal-enerġija.
Żied jgħid li, fi Triq ir-Repubblika, is-sistema ta’ dwal ġdida se tagħmel din it-triq aktar sigura biex timxi fiha anke billejl.
