Fil-ġimgħa li ħarġet id-deċiżjoni tal-Qorti tal-Appell, li Ħondoq ir-Rummien f’Għawdex se tibqa’ mhux mittiefsa, il-Prim Ministru Robert Abela qal li din hija xi ħaġa li l-Partit Laburista dejjem ħadem għaliha.
F’intervista fuq ONE Radio l-Ħadd filgħodu, il-Prim Ministru fakkar kif il-pożizzjoni tal-Partit Laburista dwar is-suġġett, dejjem kienet konsistenti.
Qal, “Dejjem ħdimna favur l-għan ewlieni li ma jkunx hemm żvilupp ġewwa Ħondoq, dak għalina kien prinċipju, u tul is-snin, dejjem ħdimna kontra min kien qed jipprova jagħmel żvilupp ġewwa Ħondoq.”
B’differenza, il-Prim Ministru qal li l-Partit Nazzjonalista, lanqas fuq Ħondoq ma jista’ jkun kredibbli.
Qal, “Il-Partit Nazzjonalista, bid-deċiżjonijiet li ħa, kien dak li ffaċilita u għamel possibbli li jkun hemm żvilupp ġewwa Ħondoq. Fl-2006 bidlu l-pjan lokali u minn sit li fih seta’ jsir biss afforestazzjoni, bidlu l-pjan lokali u minflok afforestazzjoni biss għamlu li tista’ ssir żvilupp turistiku u żvilupp relatat mal-attività marittima.”
Robert Abela qal ukoll li din id-direzzjoni tagħti sens ta’ ċertezza, b’konformità sħiħa mal-miżura tliet mija u dsatax tal-manifest “Malta Flimkien”.
Qal, “Tajt direzzjoni u nkarigajt biex issir l-analiżi meħtieġa biex bidliet li huma marbutin mal-ippjanar, dak li nemmnu fih – li żvilupp f’Ħondoq ma jsir qatt, nissiġillawh, nagħtu serħan il-moħħ fit-tul issa u ma nħallux inċertezza dwar x’jista’ jiġri, nissiġġillaw is-serħan il-moħħ b’mod permanenti u niżguraw li Ħondoq mhux għall-iżvilupp – dak huwa dak li nemmnu fih, għall-ebda tip ta’ żvilupp, u għalhekk irridu nħarsu lejn soluzzjoni fit-tul.”
Meta mistoqsi dwar il-ħidma f’Għawdex mill-ġurnalist Għawdxi, Stefan Bajada, il-Prim Ministru nnota kif teżisti konverġenza u sinerġija bejn dak li jixtiequ seba’ għaqdiet mhux governattivi Għawdxin, u l-Gvern.
Dan fil-kuntest ta’ laqgħa li saret fl-aħħar jiem bejn il-Prim Ministru u koalizzjoni magħmula minn seba’ NGOs Għawdxin li jirrappreżentaw firxa kbira tas-soċjetà Għawdxija.
Qal, “Il-maġġoranza tal-għanijiet hemm sinerġija u qbil fuqhom, u dik kienet xi ħaġa li verament ħadt pjaċir, għax meta wieħed jara d-dettall tal-proposti jfisser li nistgħu niddiskutuhom u nimplimentawhom flimkien imma li jkollhom sinerġija fuq l-għanijiet hija xi ħaġa li vera ħadt pjaċir dwarha.”
Il-Prim Ministru nnota kif din il-laqgħa ma saritx f’Awwissu b’kumbinazzjoni, hekk kif il-Gvern jinsab fil-fażi intensiva tat-tfassil tal-budget għas-sena d-dieħla, u allura, dak diskuss madwar il-mejda, irid ikun ċentrali fil-miżuri għaż-żmien li ġej.
Qal, “Il-funzjoni tal-Gvern trid tkun, li joħloq ambjent tajjeb biex l-Għawdxin u l-Maltin jistgħu jgħixu komdi ġewwa pajjiżhom, jistgħu jimirħu għal opportunitajiet ġodda, u t-teħid tad-deċiżjonijiet kompletament iffukat għal dak l-għan.”
