Qasba tixxejjer mar-riħ ma tistenna xejn mingħandha ħlief li tixejjer mar-riħ. Fl-editorjal tal-Kullħadd kien innotat li l-Kap tal-Oppożizzjoni qed jagħmel proprju hekk u li m’għandu l-ebda idea ta’ x’qed jagħmel u jaqbad mal-ewwel tarf li jsib quddiemu mingħajr ma jaf fejn se jasal bih.
Din is-sitwazzjoni qed tispiċċa ġġib kull darba lil Simon Busuttil f’pożizzjoni skomda ħafna; l-ewwel nett qed jagħmel tbassir li jibqa’ biss tbassir u t-tieni qed jispiċċa jitlef kull sens ta’ proporżjon b’azzjonijiet u bi kliem li huwa ċar li jmorru lil hinn mill-etika politika.
Din it-tip ta’ attitudni hija xprunata mill-fatt li l-Kap tal-Oppożizzjoni huwa parti mill-elit u l-establishment li ħsiebu biss biex jiggranfa mal-poter. Dan f’mument fejn qed tinħass il-pressjoni enormi li huwa mdawwar biha, speċjalment wara li stħarriġ tal-opinjoni pubblika, wieħed wara l-ieħor, wera li Busuttil m’għamel l-ebda pass ’il quddiem anzi mar lura. Busuttil kien bassar ftit qabel l-aħħar elezzjoni ġenerali li kemm-il darba jitla’ Gvern Laburista konna se nispiċċaw imorru nitkarrbu quddiem l-Ewropej,li kellna mmorru gas down gol-ħajt u li kien qed jara l-bozoz ħomor.
L-editorjal spjega li l-Kap tal- Oppożizzjoni bassar dan mhux biss għax ried ibeżża’, iżda għax ħaseb li Gvern Laburista kien se jimxi kif huwa kien imdorri jimxi bih fi Gvern Nazzjonalista. Illum kulħadd jaf kemm Simon Busuttil mar żmerċ. Żmerċ kif mar ukoll f’dak li għandu x’jaqsam mal-qgħad li qal li kellu jlaħħaq it-8,000 ruħ. Illum ħareġ kif mhux biss għandna l-inqas rata ta’ qgħad fl-istorja iżda li fi ftit inqas minn 3 snin kienu maħluqa 23,000 impjieg. Illum kulħadd jaf min għandu l-vera kredenzjali fil-qasam tax-xogħol, iktar u iktar meta min tkellem fuq il-qgħad, l-ewwel ħaġa li għamel meta laħaq Kap tal- PN kien li ta s-sensja lill- ħaddiema ta’ dik li kienet l-istamperija tal-Partit Nazzjonalista.
Anke fuq id-De La Rue, Busuttil u sieħbu Jason Azzopardi, tgħidx kemm bassru u ħarrfu li l-Gvern ma kien qed jagħmel xejn biex iżomm lill-kumpanija milli titlaq, li ma kien qed jagħmel xejn biex isalva l-impjiegi tal-ħaddiema, biex imbagħad joħroġ li l-kumpanija mhux biss mhux se tkeċċi lill- ħaddiema, iżda se tkun qed tkabbar l-operat tagħha b’60 ruħ. Jidher li fuq tal- Actavis, li dan il-Gvern diġà ħa azzjoni u se jsib impjiegi alternattivi għall-ħaddiema, Simon Busuttil se jagħmel l-istess żball.
U hawn toħroġ il-kwistjoni tal-propożjon. Il-Kap tal-Oppożizzjoni bi kliem bħal ‘mafja’, li jsejjaħ kull ħaġa li tiċċaqlaq ‘korruzzjoni’, iżda bil-wiċċ kollu jibqa’ mdawwar bl-abbatini madwaru,u li jaċċetta kliem bħal li ‘Joseph Muscat huwa l-agħar dizgrazzja mill- pesta ’l hawn,’ turi kemm m’għandux idea ta’ fejn għandu jżomm pass lura, atteġġjament li bih qed ikompli jifred il-poplu.
Dan huwa l-istess Kap tal- Oppożizzjoni li bagħat lill- ġurnalisti tiegħu jiġru wara l-investituri fl-ajruport. L-istess Simon Busuttil li għamel manifestazzjoni politika quddiem il-Qorti fuq kawża li beda ċittadin privat, meta huwa stess kien għamel libelli kriminali kontra ħaddieħor. Fuq kollox dan huwa Kap tal- Oppożizzjoni li fejn ikun hemm aħbar ħazina jew xi ħaġa li ddoqq għal widnejh tarah iparla mill-ewwel u fejn ikun hemm xi ħaġa li ma ddoqqx għal widnejh tarah jaqbad u jispara bl- addoċċ fuq kollox u fuq kulħadd.
L-editorjal tal-Kullħadd temm jgħid li la Simon Busuttil li ma tistax tiġih waħda tajba fit-tbassir li jagħmel, li m’għandux idea sa fejn għandu jaqta’ linja, jieħu pjaċir tant jiċċelebra li qiegħed fl-Oppożizzjoni bħalma għamel il-Ġimgħa għax rebaħ kawża li kkonfermat li se jibqa’ Kap tal-Oppożizzjoni, allura l-poplu m’għandux ikun hu li jneħħilu l-pjaċir fl- elezzjoni li ġejja.
