Il-Kap tal-Oppożizzjoni Simon Busuttil lest li jreġġa l-arloġġ lura anki fil-qasam tal-edukazzjoni . F’dan l-aħħar snin l-gvern investa fl-edukazzjoni , flus li qal Simon Busuttil huma flus fil-ħela .
Dan kien il-messaġġ tal-Partit Laburista f’konferenza tal-aħbarijiet fejn il-Ministru għal Edukazzjoni Evarist Bartolo ta rendikont tal-ħidma li saret f’dan is-settur, bil-għan li l-istudenti jkollhom kwalità ta’ ħajja aħjar .
Minkejja l-kampanja ta’ biża qabel l-aħħar elezzjoni ġenerali li dan il-gvern se jnaqqas l-istipendju, ġara bil-kontra u Gvern Laburista żied l-istipendju filwaqt li ta l-istipendju lil dawk l-istudenti li irrepetew sena fil-kors tagħhom . Miżura li l-gvern investa għaliha mat- €28 miljun.
Ġew introdotti servizzi ġodda bħas-servizz tac-childcare centre b’xejn fejn l-gvern nefaq mal-ħdax-il miljun u ħames mitt elf ewro .
Il-Ministru Bartolo fakkar li ġew introdotti servizzi ġodda għall-iskejjel primarji, bħal Breakfast Club u Klabb 3 to 16 . Il-gvern investa mal-miljun u sitt mitt elf ewro għal dan il-għan.
Il-gvern waqqaf fond ta’ miljun ewro sabiex jgħin studenti f’diffikultajiet. Fuq skejjel tal-knisja l-Gvern fl-2012 kien jonfoq €45 miljun. Illum jonfoq €65 miljun. Żieda ta’ 44%.
L-istipendji daħlu għal oqsma ġodda ta’ nies li qabel ma kinux jieħduhom. Fuq l-universita fl-2012 kienu ntefqu €49.7 miljun. Illum nonfqu 72.3 miljun. Żieda ta’ 45%. Fuq l-MCAST fl-2012 konna nonfqu 15.4 miljun. Illum jintefqu €24.5 miljun…żieda ta’ 59%. Fuq pagi għall-għalliema, lecturers u LSAs illum jintefqu €204 miljun. Fl-2012 kienu jintefqu €161 miljun, jiġifieri żieda ta’ 27%.
Dan minbarra l-investiment fuq laptops għall-għalliema u apparat ieħor li jgħin fil-proċess edukattiv.
Il-President tal-Forum Żgħażagħ Laburisti Alex Saliba qal li pajjiżna għamel qabżiet li sa erba’ snin ilu, żgħażagħ Maltin u Għawdxin ma kinux joħolmu. Din il-kwalità ta’ ħajja aħjar huwa rifless għall-istudenti Maltin u Għawdxin. Simon Busuttil huwa l-ikbar theddida għal dawn it-tip ta’ investimenti. Bit-track record ta’ Simon Busuttil, kien hemm diversi punti fejn żagħżagħ ħassew li kien ‘out of touch’, bħal meta qal li l-garanzija għaż-żgħażagħ kienet garanzija li ma tiswa xejn.
L-ewwel nies li jħossu tnaqqis fl-investiment ikunu ż-żgħażagħ, spjega Saliba. Għal kuntrarju, illum hemm żgħażagħ li qed jingħataw għajnuna individwali. Illum qed jingħataw stipendji lil dawk li qed jirrepetu sena..ħaġa li Busuttil ma jemminx fiha. “Kieku kien Simon Busuttil, kien isabbatilhom il-bieb f’wiċċhom” qal Saliba. L-ikbar bużżieqa kienet li jekk xi darba jkun hemm Gvern Laburista, kienu se jitneħħew l-istipendji. Għall-kuntrarju, dawn żdiedu.
“Ninsabu kburin b’dak li ksibna u ottimisti għall-futur, li verament għandna Gvern li liż-żagħżagħ ma jużahomx bħala backdrop qabel xi elezzjoni. Tkun ħasra kbira li ż-żgħażagħ jitilfu l-ġid li ksibna flimkien” temm jgħid.
