Il-Kampjonat tar-Road organizzat mill-Federazzjoni Maltija taċ-Ċikliżmu ser jiġi fi tmiem tiegħu nhar il-Ħadd li ġej 8 ta’ Lulju 2018 bit-tielet u l-aħħar tiġrija f’Tal-Maqluba, Qrendi-Żurrieq u li tibda fis-7.30am.
Fil-kategorija Elite, l-aħwa Maurice u Christian Formosa ta’ The Cyclist jinsabu jillidjaw flimkien il-klassifika bi 355 punt segwiti rispettivament minn William Hili ta’ Mosta AF Sign Studio CC bi 315. Interessanti l-fatt li dawn huma t-tlieta huma c-champions tal-aħħar tliet snin fejn Maurice Formosa kien champion fl-2015, William Hili fl-2016 u Christian Formosa fl-2017.
Marie Claire Aquilina tat-Team Greens tinsab tillidja l-kategorija tan-Nisa b’massimu ta’ 400 punt. Warajha hemm seħbitha Michelle Vella Wood bi 330 punt u Marion Pullicino ta’ Mosta AF Sign Studio CC bi 315 punt.
Isaac Spiteri ta’ The Cyclist ukoll jinsab jillidja l-Kategorija tal-Juniors b’massimu ta’ 400 punt. Warajh hemm Gianluca Camilleri ta’ B’Kara St.Joseph SC bi 350 punt u Nicholas Vella ta’ Agones SFC b’155 punt.
Fil-Kategorija tal-Masters 40+ Malcolm Cachia ta’ The Cyclist jinsab fuq quddiem b’massimu ta’ 400 punt. Warajh insibu lil Ivan Zammit ta’ B’Kara St.Joseph SC bi 350 punt u Mario Attard tat-Team Greens bi 310 punt.
Il-Kategorija tal-Masters 50+ Mark Schembri ta’ Mosta AF Sign Studio CC jinsab jillidja b’massimu ta’ 400 punt, segwit minn sieħbu Steve Mifsud bi 330 punt u Joseph Micallef ta’ The Cyclist b’175 punt.
Fil-Kategorija tal-Under 16 Sean Enriquez ta’ Mosta AF Sign Studio CC jinsab fuq quddiem bi 350 punt. Warajh hemm sħabu Nikol Micallef u Malcolm Vassallo, t-tnejn b’200 punt.
Kristina Spiteri ta’ The Cyclist tinsab fuq quddiem fil-Kategorija tal-Under 14 tat-Tfajliet b’massimu ta’ 400 punt, segwita minn żewġ ċiklisti ta’ Mosta AF Sign Studio CC, Justine De Giorgio u Bettina Falzon li għandhom 350 u 310 punt rispettivament.
Matthew Galea Pirotta ta’ Mosta AF Sign Studio CC jinsab jillidja b’massimu ta’ 400 punt il-Kategorija tas-Subien tal-Under 14. Fiż–żewġ postijiet ta’ wara nsibu żewġ ċiklisti oħra ta’ Mosta AF Sign Studio CC Luke Joseph Camilleri bi 330 punt u Nathan Zammit b’280 punt.
