F’diskors fuq il-midja soċjali, il-kandidat tal-Partit Laburista għall-Elezzjonijiet tal-Parlament Ewropew ser ikun qed jaħdem sabiex jassigura li Malta timmassimizza, l-Fondi Ewropej fil-programm li jmiss, speċjalment fil-biedja, r-riċerka u l-innovazzjoni” Dan b’mod partikolari fid-dawl li l-baġit Ewropew għar-riċerka u innovazzjoni 2021-2027 ser ikun qed jitrippla.
Dr Agius Saliba qal ukoll li l-Istati Membri ġodda, inkluż Malta, qegħdin jassorbu biss madwar 5% tal-fondi relatati mar-riċerka u l-innovazzjoni. Kien għalhekk li qal li Malta għandha taħdem biex fil-perjodu li jmiss tassorbi aktar fondi marbutin mal-qasam tar-riċerka u l-innovazzjoni biex ikompli jissaħħaħ dan l-element f’pajjiżna. Huwa irrimarka kif Malta bħalissa qed tħejji pjattaforma sabiex ikollha l-kapaċita’ li tassorbi iżjed fondi diretti marbuta mar-riċerka u l-innovazzjoni fil-programm li jmiss.
Agius Saliba kien qiegħed jitkellem fuq id-diskussjonijiet attwali fuq livell Ewropew rigward il-Multiannual Financial Framework, jew aħjar dwar il-baġit tal-Unjoni Ewropea ghall-perjodu ta’ seba’ snin. Huwa spjega li dawn id-diskussjonijiet huma sensittivi u kumplessi l-aktar minħabba li kull Stat Membru jkun qiegħed jipprova jieħu l-akbar allokazzjoni ta’ fondi possibbli, u dan filwaqt li f’dan il-proċess irid jiġi rrispettat il-prinċipju fundamentali tal-Unjoni Ewropea li ma jkunx hemm żbilanċ, iġifieri li n-nefqa ma tistax tkun aktar mid-dħul.
Dr Agius Saliba faħħar il-proċess tan-negozjati li għaddej bħalissa mill-Gvern Malti sabiex jiġi assigurat li fil-programm opeattiv ta’ Fondi Ewropej 2021-2027, Malta tingħata “fair deal”.
Agius Saliba saħaq fuq l-importanza ta’ dawn il-fondi Ewropej għaliex jolqtu b’mod dirett liċ-ċittadini kollha Ewropej, inkluż dawk Maltin u Għawdxin. Bħala eżempji, Dr Agius Saliba semma fost l-oħrajn programmi bħall-ERASMUS, li għenu lil diversi studenti Maltin u Għawdxin fl-edukazzjoni tagħhom, u li l-allokazzjoni ta’ Fondi għal dan il-programm se jirdoppja fil-programm li jmiss, u kif ukoll il-fondi tal-koeżjoni li kienu ta’ għajnuna kbira fil-bini tal-infrastruttura tal-gżejjer Maltin u fil-ħiliet taċ-ċittadini.
Rigward il-fondi tal-koeżjoni, il-kandidat Laburista għamel aċċenn għad-diskussjoni importanti li għaddejja bħalissa li tolqot b’mod dirett lil Malta u pajjiżi oħra li jinsabu f’perjodu ta’ tranżizzjoni, fejn filwaqt li l-ekonomijia tkun għaddejja b’ritmu tajjeb, xorta jkun għad hemm bżonn ta’ aktar fondi biex jiġi sostnut u kkonsolidat il-ġid li jkun qed jinħoloq u ma jaqgħux lura fil-futur.
Fid-diskors tiegħu, Dr Agius Saliba għamel referenza wkoll għal setturi oħra t’importanza għal Malta, fosthom is-settur agrikolu, fejn qal li il-mekkaniżmu preżenti fuq livell Ewropew għal Fondi tal-biedja qed iwassal għal inġustizzji u għalhekk il-bżonn li fil-programm li jmiss, it-tqassim isir b’mod iżjed ġust u ekwu.
Il-kandidat għall-Elezzjonijiet tal-Parlament Ewropew Dr Alex Agius Saliba temm jgħid li fuq livell Ewropew għandna nassiguraw li l-Unjoni Ewropea tkompli tinvesti sabiex iżżomm il-livell għoli ta’ kompetittivita’ u tkun tista’ tibqa’ tħabbatha ma’ superpotezni ekonomiċi oħra. Agius Saliba qal li jekk jingħata l-fiduċja tal-poplu fl-elezzjonijiet tal-Parlament Ewropew, hu ser ikun qiegħed jaħdem biex jassigura li jiġu ssalvagwardjati l-interresi taċ-ċittadini Maltin u Għawdxin anke fejn jidħlu fondi Ewropej.
