• Bagħat ħaddiema tal-Gvern jaħdmu fil-każin Nazzjonalista taż-Żurrieq
• Dikjarazzjoni li talabhom jiffirmaw kienet falza
• Però nuqqas f’paragrafu ta €300 lid-deputat Nazzjonalista
Il-Qorti tal-Appell ikkonfermat il-fatti ewlenin kif irrapportati fil-każ ta’ meta Toni Bezzina ordna biex ħaddiema tal-Gvern jintbagħtu jagħmlu xogħol fil-każin Nazzjonalista taż-Żurrieq.
L-Imħallef Anthony Ellul l-Ġimgħa filgħodu ta d-deċiżjoni tiegħu wara li l-Perit Toni Bezzina appella minn sentenza favur l-editur tal-Orizzont mill-Qorti tal-Maġistrati.
L-uniku differenza mill-ewwel qorti kinet dik li s-sentenza tal-appell sabet dikjarazzjoni mhux għal kollox korretta f’paragrafu wieħed u ta’ dan tat €300 f’danni lill-Perit Bezzina.
Somma żgħira meta mqabbla ma’ ammonti oħra li jingħataw f’kawżi ta’ libell.
Però wara l-Qorti tal-Maġistrat issa anke l-Qorti tal-Appell ikkonfermat kif kien fuq ordni ta’ Toni Bezzina li ħaddiema tal-Gvern marru jaħdmu fil-każin tal-Partit Nazzjonalista fiż-Żurrieq.
Aħbar li kienet żvelata għall-ewwel darba fil-gazzetta KullĦadd. Tant li l-Qorti tal-appell innotat fis-sentenza tagħha li “hu evidenti li meta dan il-każ ġie rapportat fil-gazzetta Kullħadd tal-21 ta’ April 2012, l-attur inħakem minn sens ta’ paniku.”
Il-Qorti qalet li hekk biss tista’ tinterpeta l-fatt li l-Perit Toni Bezzina bagħat għall-ħaddiema li għamlu xogħol fil-każin u talabhom jiffirmaw dikjarazzjoni. Wieħed mill-ħaddiema saħansitra kien mitlub imur jagħmel dan fil-jum tal-funeral ta’ ommu.
Id-dikjarazzjoni li talabhom Bezzina kienet tgħid li x-xogħol għamluh b’mod volontarju u minn jeddhom.
Iżda, il-Qorti tal-Appell kienet ċara. “Id-dikjarazzjoni u l-affidavit, għall-inqas f’parti minnhom, ma jirriflettux il-fatti kollha tal-każ.”
Hawn reġa’ kien innotat kif it-tliet ħaddiema marru jaħdmu fil-post għaliex ċertu Joseph Borda, li kien is-superjur tagħhom, qalilhom.
Borda kkonferma iktar minn darba li talab lill-ħaddiema jagħmlu dan ix-xogħol fuq ordni ta’ Bezzina u kien biss meta waslu ż-Żurrieq li l-ħaddiema fehmu x’kellhom jagħmlu.
“Il-qorti ssib ukoll element ta’ sudditanza. Bla dubju dawn il-ħaddiema ma kellhomx jitqiegħdu f’din il-pożizzjoni,” kompliet tinnota l-qorti fis-sentenza tagħha.
Il-qorti nnotat li l-ħaddiema sabu ruħhom fis-sitwazzjoni fejn kellhom jagħmlu dikjarazzjoni u wara affidavit.
Il-qorti kienet ċara: “Meta għamlu dikjarazzjoni u wara l-affidavit … il-ħaddiema baxxew rashom għar-rieda tas-superjuri tagħhom.”
Il-Qorti tinnota kif il-Perit Toni Bezzina kkonferma li kien hu li kiteb id-dikjarazzjoni lill-ħaddiema u ħadhom għand in-nutar. Nutar li għażlu hu.
Il-Qorti innotat kif kien hemm verżjonijiet mhumiex ċari dwar x’kienu l-ħinijiet tax-xogħol tal-ħaddiema. Borda u l-ħaddiema kkonfermaw li l-ħin tax-xogħol kien sal-ħamsa neqsin kwart għalkemm jitilqu qabel jekk ilestu, Bezzina qal li kienu jaħdmu sas-siegħa u nofs.
Il-ħaddiema xehdu li marru jaħdmu waqt il-ħin tax-xogħol għax kienu marru wara nofsinhar u l-qorti żiedet li “tara diffiċli temmen li Curmi u Inguanez ma kinux jafu x’inhu l-ħin tax-xogħol tagħhom.”
Fir-rapport tagħha l-Orizzont kienet qalet li Bezzina kien talab lill-ħaddiema jagħmlu dikjarazzjoni li x-xogħol m’għamluhx. Dan meta fil-fatt kien talabhom jgħidu li għamluh minn jeddhom. Għalkemm anke fil-Qorti rriżulta li m’għamluhx minn jeddhom dan id-dettall kien biżżejjed għall-Qorti tal-Appell biex tikkumpensa tliet mitt ewro lil Bezzina, filwaqt li tikkonferma l-fatti ewlenin tal-każ.
