Żewġ persuni ġew ikkundannati 7 xhur u 8 xhur priġunerija rispettivament flimkien ma’ multa ta’ €4,000 wara li nstabu ħatja b’rabta ma’ akkużi ta’ serq u li darbu uffiċjali tal-Pulizija
Kidu Gebremariam Gebrecharikos mill-Eritrea u Mustafa Aseyr Ahmed mis-Somalja nstabu ħatja mill-Maġistrat Joe Mifsud.
Il-każ seħħ lura fid-9 ta’ Ottubru f’Paceville meta l-Pulizija rċevew rapport dwar serq ta’ mowbajl minn żewġ persuni Afrikani. Fil-fatt irriżulta li wieħed mill-irġiel seraq il-mowbajl u ħarab flimkien ma’ raġel ieħor.
Wara li l-Pulizija fittxew l-akkwati, il-Pulizija lemħu lil wieħed mill-imputati u waqfuh. Waqt li kienu qed jispjegawlu għaliex twaqqaf, ir-raġel beda jkun aggressiv u beda miexi l-bogħod mill-Pulizija, b’riżultat li kellu jitwaqqaf. Kien hawn li żewġ uffiċjali tal-Pulizija ġarbu xi ġrieħi.
Intant, tim ieħor tal-Pulizija lemħu lir-raġel l-ieħor hekk kif id-deskrizzjoni li ngħataw tiegħu qablet mal-imputat. Dan ukoll prova jitlaq minn fuq il-post wara li ma aċċettax li jiġi jitkellem mill-Pulizija minkejja li qalulu li kien suspettat li seraq mowbajl. Hawn ukoll ir-raġel ġie arrestat b’riżultat li uffiċjal tal-Pulizija ieħor spiċċa midrub.
Filwaqt li meta tressqu l-Qorti l-imputati wieġbu mhux ħatja, f’seduta separata, l-istess imputati ammettew b’mod volontarju l-akkużi miġjuba kontrihom u għalhekk instabu ħatja.
Fl-għoti tas-sentenza tiegħu, il-Maġistrat Joe Mifsud tenna li l-Pulizija jridu jkunu protetti waqt li jkunu qed jaqdu d-dmirijiet tagħhom u ħadd ma huwa skużat milli jhedded xi uffiċjal tal-Pulizija jew b’xi mod iweġġahom.
Dan filwaqt li l-Pulizija għandha tkun obduta mill-ewwel u għandu jintwera rispett lejn kull uffiċjal dejjem u kullimkien.
B’rabta ma’ dan il-Maġistrat Joe Mifsud temm jgħid li l-Qorti ma tridx li membri tal-Korp tal-Pulizija jiddemoralizzaw ruħhom għaliex għad hawn min jaħseb li huwa ’l fuq mil-liġi u ma jirrispetta lil ħadd. Sostna li attakk fuq membru tal-Korp tal-Pulizija jew xi forza oħra tal-ordni huwa attakk fuq is-soċjetà kollha.
