Sentenza sospiża u ordni ta’ superviżjoni wara li ammetta li seraq

Raġel ta’ 63 sena tpoġġa taħt ordni ta’ superviżjoni filwaqt li ngħata sentenza sospiża wara li ammetta li wettaq numru ta’ serqiet li jmorru lura għal Settembru tas-sena li għaddiet.

Quddiem il-Maġistrat Gabriella Vella, l-Ispettur Ritienne Gauci qalet li r-raġel, minn Marsaskala, seraq kompressur tal-arja, dgħajsa u għodda relatata mal-biedja fost oħrajn.

Id-difiża, f’isem l-imputat, ammettiet l-akkużi u ġibdet l-attenzjoni għall-fatt li r-raġel isofri minn kundizzjoni ta’ saħħa mentali.

B’hekk, fid-dawl tal-ammissjoni tiegħu, il-Qorti kkundannatu għal sentejn ħabs sospiżi għal erba’ snin filwaqt li ordnat li jitpoġġa taħt ordni ta’ superviżjoni għal 4 snin.