Waqt li ninsabu ftit jiem biss ‘il bogħod mill-bidu ta’ sena ġdida, l-elfejn u tmintax se ttemm kapitlu ieħor ta’ xogħol estensiv fil-qasam infrastrutturali ta’ pajjiżna.
Sena li matulha saru bosta proġetti infrastrutturali bil-għan li jnaqqsu l-problema tat-traffiku u l-tniġġis fl-arja. Dan b’investiment ta’ aktar minn sittin miljun ewro.
Il-bidu tal-2018 rat l-inawgurazzjoni tal-Kappara Junction mill-Prim Ministru Joseph Muscat li mill-ewwel ħalliet l-effett tagħha hekk kif naqas sew il-ħin ta’ stennija li s-sewwieqa kienu jqattgħu f’din iż-żona.
Notevoli wkoll il-proġett tal-Marsa Ħamrun bypass li tweesgħet u nbniet mill-ġdid b’nefqa ta’ 14-il miljun ewro.
F’Novembru tlestiet wkoll it-tieni fażi tal-proġett tal-Marsa Junction li issa għandha għaxar karreġġjati u beda x-xogħol mill-ewwel fuq it-tielet fażi tal-proġett li se jwassal għall-bini ta’ seba’ flyovers f’waħda mill-aktar żoni traffikużi fin-Nofsinhar tal-pajjiż.
Proġett li waħdu ser ikun qed jiswa 70miljun ewro.
Matul is-sena, il-Ministru għat-Trasport Ian Borg ħabbar ukoll is-Central Link Project li kienu ilu fuq il-karti għexieren ta’ snin. Proġett li mhus biss se jnaqqas il-konġestjoni fiċ-ċentru tal-pajjiz, iżda jnaqqas l-emmissjonijiet fil-qalba tal-irħula tal-madwar.
Il-proġett jinkludi bini ta’ toroq ewlenin fiċ-ċentru ta’ Malta biex jitnaqqas bin-nofs il-ħin tal-ivvjaġġar fir-rotta ewlenija bejn l-Imrieħel u l-Mosta.
Il-Ministeru għat-Trasport ħa ħsieb wkoll proġetti bħal dawk ta’ Triq l-iMdina f’Ħaż Żebbuġ, Triq il-Keffa fis-Swieqi, Triq BontadinI u Vjal ix-Xarolla fiż-Żurrieq.
Intant kollox jindika li l-2019 ser tkun sena oħra bieżla fil-qasam Infrastrutturali ta’ pajjiżna.
Filfatt ħarġet sejħa għall-offerti għall-bini mill-ġdid ta’ 120 triq residenzjali. Dan bħala parti mill-pjan tal-Gvern li jtejjeb it-toroq Maltin u Għawdxin b’investiment ta’ €700 miljun ewro.
Fl-istess waqt Infrastructure Malta qed tkompli taħdem sabiex tidentifika it-tieni u t-tielet grupp ta’ toroq li ser jinbnew mill-ġdid bħala parti mill-istess pjan.
F’nofs is-sena d-dieħla ser toħroġ sejħa internazzjonali għall-bini tal-mina ta’ 13-il kilometru bejn Malta u Għawdex u sal-ewwel kwart tas-sena d-dieħla mistenni wkoll ikun lest ix-xogħol fuq it-Triq Reġjonali. L-investiment ta’ 7 miljun ewro ser jinkludi twessiegħ tat-triq għal sitt korsiji mill-mini tal-Qroqq sal-mini ta’ Santa Venera.
Ħarġu wkoll il-permessi għall-bini tal-mini ta’ Santa Luċija. Proġett li wkoll mistenni jibda s-sena d-dieħla.
