L-erbgħa ta’ Awwissu tal-2020.
Dik li kellha tkun lejla kwieta sajfija fil-Belt ta’ Beirut inbidlet f’waħda ta’ paniku, ħsarat maġġuri u mwiet.
Idoqqu s-sitta ta’ filgħaxija u magħhom tfeġġ splużjoni minn maħżen fil-port li saħansitra nħasset minn 240 kilometru ’l bogħod minn Ċipru.
Ftit minuti wara l-midja soċjali tibda twassal l-ewwel filmati xokkanti mal-erbat irjieħ tad-dinja.
Filmati li juru splużjoni tant kbira li ħafna saħansitra ħasbuha finta madankollu mhux li kien, hekk kif l-istazzjonijiet tal-aħbarijiet bdew iwasslu l-ewwel żviluppi.
Aktar minn 200 persuna jitilfu ħajjithom, madwar sebat elef jindarbu u biljuni ta’ liri fi ħsarat maġġuri infrastrutturali.
Propju ftit wara ġie stabbilit kif il-kawża tal-isplużjoni seħħet wara li feġġew n-nirien f’maħżen bl-isem Hangar 12 u li fih kien hemm ħażna kbira ta’ nitrat tal-ammonju.
Kimika ewlenija li tintuża fil-produzzjoni tal-isplussiv u li saħansitra ntużat bl-isplużjonijiet tal-Belt ta’ Oklahoma fl-1995.
Huwa mifhum li dik il-ħażna kienet ilha hemmhekk għal 6 snin sħaħ mill-2013 u kienet tesa madwar 2,750 tunnellata.
Wara stħarriġ mill-awtoritajiet Lebaniżi rriżulta kif wara li din waslet fil-Port waqt li kienet fi triqitha lejn il-Mozambique, is-sidien tagħha spiċċaw abbandunawha bl-awtoritajiet jitrasferixxuha fil-maħżen bl-intenzjoni li din tiġi meqruda. Għal xi raġuni dan qatt ma sar.
L-awtoritajiet pattew qares għal dan hekk kif propju 6 ijiem wara l-isplużjoni rriżenja l-Prim Ministru Hassan Diab flimkien mal-Gvern kollu.
Sal-lum Diab baqa’ Prim Ministru temporanju b’poteri limitati wara li baqa’ ma ġiex iffurmat Gvern ġdid.
Dwar din l-aħħar sena u l-progress li sar fil-Libanu mindu seħħet l-isplużjoni, ONE News tkellem mal-Ambaxxatur Malti għal-Libanu Dr André Borg.
Qal, “Jiena kont hemm ftit tal-ġranet ilu. Iż-żona tal-Port propja mix-xatt għad hemm sitwazzjoni li wieħed irid jerġa’ jinvesti mill-aspett ta’ infrastruttura fil-Port. Fil-fatt hemm pjanijiet biex dan jerġa’ jinbena però bħala binjiet residenzjali nista’ ngħid li ħafna minnhom wara sena tranġaw.”
Dr Borg tenna kif il-poplu għadu qed jistenna b’ħerqa sabiex jitressqu quddiem il-ġustizzja dawk responsabbli ta’ din it-traġedja li setgħet ġiet evitata.
Qal, “Il-poplu Lebaniż għadu qed jistenna r-risposti ta’ x’ġara u min kien responsabbli. Sa issa għadu ma tressaq ħadd, u ħadd ma huwa responsabbli u allura s-sitwazzjoni bħalissa f’Bejrut hija propju ta’ stennija biex jaraw fil-fatt jekk hux se jitressqu xi nies il-Qorti u allura ssir ġustizzja. Mhux biss mal-vittmi u l-familji tagħhom imma wkoll sabiex il-pajjiż jimxi ’il quddiem.”
Borg spjega wkoll li pajjiżna mhux biss kien ta’ għajnuna għal-Libanu fl-aħħar sena iżda għadu għaddej b’ħidma ta’ sostenn sa issa.
Spjega, “Naf li anke bħalissa hemm inizjattiva oħra wkoll li se jintbagħtu xi prodotti mediċinali għat-trabi jiġifieri anke llum il-ġurnata sena wara għad hemm inizjattivi għaddejjin kemm min-naħa tal-privat, kemm min naħa ta’ għaqdiet karitatevoli jiġifieri hemm iva awareness.”
