Hekk kif ninsabu ftit jiem biss il-bogħod mill-bidu tal-istaġun tas-sajf, bħal dan iż-żmien is-soltu wieħed jibda jinnota li l-irħula u l-ibliet Maltin u Għawdxin jibdew jieħdu l-ħajja u jippreparaw għall-festi tradizzjonali li jiġu ċċelebrati fil-Gżejjer tagħna. Jibda jinħass l-entużjażmu tad-dilettanti tal-festi sabiex il-maġġoranza tal-lokalitajiet tagħna jibdew jilbsu l-libsa tal-festa, il-Pirotekniċi jibdew jagħlqu x-xogħol tal-logħob tan-nar u jippreparaw għall-ħarqiet spettakolari ta’ kull ġimgħa, fl-istess waqt ikunu fl-aqwa tagħhom it-tħejjijiet mill-Għaqdiet għall-dik li hija l-festa Maltija.
Hekk ukoll fl-istazzjonijiet ONE sa mit-twaqqif tagħhom, kemm permezz tat-Televiżjoni u anke r-Radju matul dan iż-żmien jibdew iħejju l-iskeda tas-sajf fejn minn dejjem kien iddedikat u allokat ħin u ta l-importanza għal dik li hija il-Kultura ta’ pajjiżna u allura il-festi tradizzjonali tagħna. Din is-sena mhux eċċezzjoni.
Fin-nuqqas tal-festi li ma ġewx iċċelebrati kif normalment nafuhom, matul is-sajf tas-sena 2020 l-istazzjon Televiżiv ONE wassal fid-djar tat-telespettaturi tiegħu programm li kien kollu kemm hu ffukat fuq il-manifattura tal-logħob tan-nar. Produzzjoni li twaslet preċizament mill-Fabbriki tal-logħob tan-nar ta’ kull ġimgħa. Proġett li ntlaqa’ tajjeb ferm kemm mid-dilettanti tan-nar, kif ukoll minn numru kbir ta’ telespettaturi li setgħu japprezzaw mill-qrib u f’ aktar dettal din l-arti u l-kapaċita ta’ Maltin u Għawdxin li jaħdmu dan ix-xogħol.
Għaldaqstant qed jiġi mħabbar li matul is-sajf li ġej, il-programm PIROTEKNIĊI se jkun qed jerġgħa jsib postu fuq l-iskeda tal-istazzjon ONE. Wara d-domanda kbira li kellu dan il-programm matul is-sena li għaddiet, anke f’dik li hija parteċipazzjoni, din is-sena il-produzzjoni ħasbet sabiex l-għażla ta’ min ser ikun qed jieħu sehem fil-programm ser issir permezz ta’ sejħa għall-espressjoni ta’ interess lill-kumplessi tan-nar infushom.
Għalhekk qed tinħareg din is-sejħa għall-dawk l-Għaqdiet li għandhom Kumpless tan-Nar u jixtiequ ikunu parti minn din il-produzzjoni ta’ matul din is-sena 2021. Dawk interessati u għal aktar dettalji huma mitluba li jagħmlu kuntatt mal-produzzjoni fuq festi@oneradio.com.mt jew permezz tal-paġna l-ġdida fuq facebook bl-isem ta’ Pirotekniċi sabiex jiksbu l-formola tal-applikazzjoni. L-applikazzjonijiet ser jibqu miftuħa sa nhar is-Sibt 12 ta’ Ġunju 2021, 4:00PM.
PIROTEKNIĊI bi produzzjoni u preżentazzjoni ta’ Aaron Zahra u Brian Bonnici. L-appuntament magħkom it-telespettaturi li għandkom għall-qalbkom il-festa Maltija huwa għal matul is-sajf li ġej, fuq ONE.
