Il-Ħamis, 22 ta’ Awwissu, Malta sellmet għall-aħħar darba lill-Kap tar-Rappreżentanza tal-Kummissjoni Ewropea f’Malta, Lorenzo Vella.
Kien il-Ħadd filgħodu, meta tħabbret il-mewt ta’ Lorenzo, fl-eta ta’ 43 sena wara li ħakmu kanċer terminali u ħalla jibkuh lil martu Cheryl u liż-żewġ uliedu.
Mat-tokki tal-għaxra, it-tebut ta’ Lorenzo daħal fil-Bażilika ta’ Kristu Re, f’Raħal Ġdid.
Kulħadd b’ilbies ikkulurit, xewqa li esprimew il-qraba tiegħu bħala rifless tal-pożittivita’ li kien iħaddan, il-bażilika mtliet sa ruħ ommha.
Kien il-qassis Salesjan Gerald Mangion li għamel l-omelija, li fiha ddeskriva lil Lorenzo bħala xbieha ta’ Alla hekk kif għex ħajtu fl-għerf u l-għaqal.
Huwa kompla jgħid li għalkemm Lorenzo sar jaf li għandu marda terminali, huwa kompla jgħix fl-imħabba ma’ Alla u dejjem ipprova jgħin lil kulħadd. Tenna li l-imħabba fil-qalb ta’ Lorenzo kienet impressjonanti.
Huwa qal li fl-aħħar jiem żar lil Lorenzo l-isptar u hemmekk Lorenzo qallu li permezz tal-marda tiegħu dahar aktar lejn Alla u jagħtih il-faraġ.
Huwa kien inħatar fl-irwol li kellu fl-ewwel ta’ Marzu tas-sena l-oħra, wara esperjenza ta’ 15-il sena fl-Affarijiet Ewropej fi Brussell u fil-Lussemburgu, u anki fis-servizz pubbliku hawn Malta.
Sa dakinhar kien iservi bħala r-Rappreżentant Permanenti ta’ Malta għall-Kunsill tal-Ewropa fi Strasburgu.
Lorenzo Vella kien ukoll protagonist ewlieni għal-laqgħa tal-MED9 li saret f’Settembru li għadda f’pajjiżna, fejn kien hu li ħabbar li l-President tal-Kummissjoni Ewropea, Ursula von der Leyen, kienet se tiġi għat-tieni darba f’pajjiżna.
Lil Lorenzo Vella konna smajna bih lura f’Marzu tal-2016, meta hu u martu, dakhinar b’għoxrin ġimgħa tqala, kienu sfaw vittmi tal-attakk terroristiku li kien seħħ fl-ajruport ta’ Brussell u li ħasad il-ħajja ta’ 22 persuna.
Preżenti kien hemm membri tal-Kabinett tal-Ministri, membri parlamentari miż-żewġ naħat tal-kamra u l-ispeaker tal-Parlamemt Anġlu Farrugia.
Segwu ċ-ċelebrazzjoni tal-ħajja hawn taħt:
