It-tlieta u għaxra ta’ wara nofsinhar. Il-pjazza ta’ quddiem il-Bażilika tal-Mosta b’serbut twil ta’ tfal u żgħażagħ, kollha b’warda bajda f’idejhom, li tfisser is-sens t’apprezzament lejn dak li kien fejjaqhom jew għenhom matul ħajjithom.
Warajhom it-tebut li imbagħad għadda minn nofshom għall-aħħar tislima xierqa lit-Tabib maħbub Dr Victor Calvagna.
Fil-Bażilika deher is-sens t’apprezzament lejn dan it-Tabib twajjeb li ħalla din id-dinja f’qasir il-għomor wara li kien involut f’inċident lejn l-aħħar tas-sena li għaddiet.
Minkejja l-għerf li kellu Victor Calvagna, kif qal il-qassis Anton Briffa, il-valuri li kellu u li għallem lil bosta bihom, kienu ġejjin minn qalbu.
“Victor twieled b’qalb tad-deheb, ma kinitx l-iskola li għamlitu hekk, ma kinitx l-Università li għamlitu hekk, ma kienux is-snin li għamel jaħdem fir-Royal Mardens Hospital ġewwa Londra li għamluh hekk. Victor twieled minn ġuf ommu b’qalb tad-deheb.”
Intant, kienet innutata l-preżenza ta’ Rennie u Angele li flimkien mal-President ta’ Puttinu, Dr Calvagna ħadmu qatiegħ permezz tal-istess għaqda li dejjem offriet appoġġ għat-tfal morda bil-kanċer u l-familji tagħhom.
Matul il-karriera tiegħu Dr Calvagna speċjalizza fil-kanċer tat-tfal wara li ħa l-ispeċjalizzazjoni tiegħu ġewwa Royal Marsden Hospital fl-Ingilterra.
Bħala l-ewwel konsulent Malti għat-tfal morda b’mard serju huwa fejjaq b’suċċess il-maġġoranza tal-pazjenti tiegħu.
Għall-funeral attendew ukoll l-ogħla awtoritajiet tal-pajjiż fosthom il-Prim Ministru Robert Abela, l-Ispeaker tal-Parlament Anġlu Farrugia u l-Kap tal-Oppożizzjoni, fost bosta membri parlamentari oħra.
Dr Calvagna, it-Tabib umli, it-Tabib li llum m’għadux magħna iżda l-marka tiegħu tibqa’ f’dawk it-tfal li għada pitgħada jikbru u filwaqt li jkollhom familja, jafu lil Calvagna għat-twelid mill-ġdid tagħhom.
