Il-Gvern ħabbar u nieda l-iskema ta’ għajnuna finanzjarja għal dawk il-ġenituri bi tfal taħt is-16-il sena u li kellhom jieqfu mix-xogħol b’leave mingħajr ħlas biex jieħdu ħsieb uliedhom minħabba l-għeluq tal-iskejjel.
Din l-iskema hija applikabbli għal ġenituri ta’ tfal taħt is-16-il sena, f’koppja miżżewġa, f’unjoni ċivili jew f’koabitazzjoni, fejn iż-żewġ membri tal-koppja jaħdmu.
L-iskema tgħodd ukoll għal ġenitur waħdu li: jaħdem full-time jew part-time fis-settur privat; ma jistax jaħdem mid-dar; ma jistax imur għax-xogħol biex jieħu ħsieb it-tfal f’xi perjodu bejn il-15 ta’ Marzu u l-11 ta’ April; ikun fuq leave bla ħlas u min iħaddmu ma jkunx qed jirċievi l-Wage Supplement għalih.
Fil-każ ta’ koppja fejn iż-żewġ ġenituri jaħdmu u t-tnejn ma jistgħux jaħdmu mid-dar, il-benefiċċju jitħallas lil wieħed jew waħda miż-żewġ ġenituri.
F’konferenza tal-aħbarijiet bit-tema Gvern Għan-nies, is-Segretarju Permanenti fi ħdan il-Ministeru għall-Familja Mark Musù spjega kif se jkunu mqassma l-ħlasijiet għal dan il-benefiċċju, li wkoll se jħares d-drittijiet għal pensjoni kontributorja.
Huwa spjega: “F’din l-iskema, persuna li taħdem full-time, tibda titħallas dan il-benefiċċju fl-ammont ta’ €166.15 fil-ġimgħa u persuna li taħdem part-time, tibda titħallas dan il-benefiċċju fl-ammont ta’ €103.85 fil-ġimgħa.”
Intant, ir-rata taċ-Children’s Allowance imħallsa tista’ tiġi aġġustata skont id-dħul il-ġdid u tista’ tiżdied skont il-każ, u min għandu dritt għall-In Work Benefit u Tapering tal-Benefiċċji jibqa’ jirċievih bla waqfien u mingħajr tnaqqis.
Il-Ministru għall-Familja Michael Falzon qal din l-iskema se tiżgura li ħadd ma jitlef xogħlu.
Huwa qal, “Ilna ngħidu li aħna nemmnu making work pay, għinna kemm stajn biex ninċentiva lin-nies jidħlu fid-dinja tax-xogħol u hawnekk minbarra l-għajnuna finanzjarja qegħdin ukoll naraw dik l-għajnuna biex bniedem jibqa’ fid-dinja tax-xogħol qiegħda tingħata wkoll.”
Min-naħa tiegħu l-Ministru għall-Finanzi u Xogħol Clyde Caruana spjega kif is-sena l-oħra mill-miżura kienu qed igawdu erbat elef u ħames mitt ruħ b’nefqa ta’ tliet miljun u nofs ewro.
Huwa sostna: “Matul l-aħħar snin l-ekonomija tagħna kibret u x-xogħol u l-frott ta’ dan kollu kien grazzi għall-ħaddiema Maltin u Għawdxin u issa ninsabu f’mument fejn il-Gvern irid iwieżen l-istess ħaddiema Maltin u Għawdxin.”
Il-pagament se jibda jitħallas dirett fil-kont bankarju tal-applikant kull ġimgħa. Din l-iskema hija applikabbli mill-15 ta’ Marzu sal-11 ta’ April 2021. Madankollu dan il-perjodu jista’ jkun estiż jekk ikun meħtieġ.
L-applikazzjoni għall-benefiċċju tinsab online fis-siti: socialsecurity.com.mt u familja.gov.mt.
