Se tiġi organizzata t-tielet edizzjoni tal-Mixegħla tal-Qaddisin f’Għawdex.
Diversi parroċċi madwar Għawdex ta’ kull sena jieħdu sehem f’din l-attività għall-Festa tal-Qaddisin, fejn b’eluf ta’ xemgħat jinħolqu immaġini artistiċi, f’ambjent mill-isbaħ li kapaċi joħloq id-dawl tax-xemgħa.
Nhar il-Ħadd 30 ta’ Ottubru, mis-sitta ta’ filgħaxija ’l quddiem, installazzjonijiet magħmulin minn eluf ta’ xemgħat se jieħdu forma relatata mal-Qaddis Patrun tal-post u se jkunu mpoġġija fuq iz-zuntier jew il-pjazza tal-lokalitajiet f’Għawdex.
Din l-edizzjoni tnediet mill-Ministru għal Għawdex Clint Camilleri li saħaq kif din hija attività oħra li mistennija tiġbet lejha eluf ta’ nies lejn il-gżira Għawdxija.
Il-Ministru żied jgħid li inizjattivi bħal dawn iżommu ħajjin lit-tradizzjonijiet Għawdxin, u Għawdex tkompli tkun destinazzjoni ta’ matul is-sena kollha b’attivitajiet li jolqtu lil kulħadd.
