F’Ħal Safi l-Prim Minsitru ta’ Malta Joseph Muscat qal li kienet ġimgħa storika fejn dak li ħadem għalih il-pajjiż kien dejjem immirat biex issir differenza fil-ħajja tan-nies u fil-ħajja tal-Maltin u l-Għawdxin.
Sar dak li kienu qalu li impossibbli li jsir – intlaħaq ftehim bejn it-Taljanu u l-Libjani li permezz tiegħu mhux se jissolva kollox imma se jkun iktar faċli biex il-Libja tingħata għajnuna u ma jibqax pajjiż passatur minn fejn jgħaddu eluf. Il-fatt li għad hemm problemi fil-Libja mhix skuża biex ma jsir xejn. “Qed nuru li r-realtà tan-nies, aħna nifmuha” stqarr Muscat, filwaqt li qal kemm jifhem lin-nies ta’ Ħal Safi, li għandhom qalbhom tajba iżda li s-sitwazzjoni tal-migrazzjoni jaf tinkwetahom. “Nistgħu ngħinu, jekk in-numri jkunu kkontrollati” qal il-Prim Ministru, u qal li Malta sabet l-appoġġ, speċjalment mill-ġirien Taljani.
L-Erbgħa filgħaxija ġew salvati 1,400, fakkar il-Prim Ministru, u bejn il-Ħamis u l-Ġimgħa telqu 12-il dgħajsa mil-Libja għall-Ewropa. Anke akkost li Malta tkun attakkata, se jsir minn kollox biex it-traġedja umana mmexxija minn kriminali tieqaf. Kriminali li jaqilgħu mal-ħames miljuni fil-ġimgħa. Filwaqt li trid tingħata għajnuna lil min hu verament ippersegwitat, jekk xi ħadd li ġej lejn l-Ewropa m’għandux raġuni valida biex jingħata protezzjoni, dan se jintbagħad lura.
Muscat qal li din il-ġimgħa, l-Ewropa rrealizzat li hemm problema u bdiet taħdem biex issolvi l-problema.
Il-Prim Ministru tkellem dwar il-kuriduri umanitarji; sistema fejn min irid jemigra jagħmel dan mingħajr ma jkollu bżonn jissogra ħajtu.
Intant din il-ġimgħa, il-Maltin stess investew €300 miljun fi proġett ta’ kwalità li se jfisser 1,500 post tax-xogħol ġdid. Dan huwa proġett fejn dak li jkun lest iħallas aktar għax se jingħata kwalità aħjar, għas-servizz u għall-kamra tal-lukanda. Meta dak li jkun jippretendi servizz aħjar, min jimpjega jrid iħallas aħjar. Bi proġett bħal ta’ din il-ġimgħa ġej l-investiment, ġej turist li jħallas aktar, u min iħaddem se jkollu jħallas aktar lill-ħaddiema biex jipprovdu dak is-servizz. B’hekk tkun idirizzata l-problema tal-qgħad, iżda mhux biss. Issa jmiss li jkunu indirizzati n-nies li għandhom ix-xogħol imma mhux qed jitħallsu biżżejjed ta’ dak ix-xogħol.
“Aħna ma niddejqu xejn immorru nieħdu kikkra te’ man-nies, anzi kburin li qatt ma ninqatgħu minn man-nies. Kburin li aħna tfal ta’ ħaddiema, ta’ nies li bdew mix-xejn” qal Joseph Muscat.
Ma’ dan l-investiment il-Gvern qed jimxi biex juri li t-turiżmu mill-ġdid huwa karriera. Mhix xi ħaġa li wieħed jagħmel part-time, jew li xi ħadd jagħmel għax ma jirnexxix fl-iskola. Il-qasam tas-servizz huwa karriera, li b’investimenti bħal dawn se jkun qed iħallas aħjar. Ħeġġeġ lill-ġenituri biex jinkoraġġixxu lit-tfal ikomplu bl-iskola.
Il-Prim Ministru fakkar li se tinbena lukanda fin-nofsinhar ta’ Malta, li flimkien ma’ ITS imtejjeb fi Smart City, se tkun qed tipprovdi opportunitajiet u postijiet tax-xogħol tajba.
L-investiment kien partikolari anke fil-mod li bih inxtrat l-art fejn se ssir il-lukanda ta’ sitt stilel f’San Ġiljan. Tqabbdet kumpanija tal-awditjar indipendenti li tat stima professjonali li qatt ma saret bħala f’pajjiżna. Minn fuq, il-Gvern daħħal klawżola li tiżgura li l-prezz jibqa’ tajjeb anke fil-futur.
Din il-ġimgħa wkoll ġiet kumpanija tal-fantasy sports hawn Malta, minn tant pajjiżi. “Hija parti mill-istrateġija li għandna” qal il-Prim Ministru, filwaqt li tkellem dwar il-viżjoni ta’ pajjiż kożmopolitan.
“Dan il-pajjiż iġib riżultati ferm ikbar milli ġab sal-lum” sostna Muscat, u qal li Malta kapaċi tkun “top of the league”. Dan meta kien hemm żmien meta dejn, defiċit u qgħad biss kien jitħalla minn Gvern għall-ieħor.
Din il-ġimgħa wkoll se jiżdiedu l-ammont ta’ mediċini b’xejn għal min ikollu l-kanċer. Min għandu l-kanċer m’għandux ħin x’jistenna, qal il-Prim Ministru u fakkar li l-mediċina qed tasal fi djar f’aktar lokalitajiet.
Fi kliem il-Prim Ministru: “Għalija l-ikbar riżultat huwa l-mod ta’ kif aħna qed naġixxu. Min m’għandux argumenti, l-unika tama li jista’ jkollu hija li jifred u li jipprovoka. In-nies jifmhu. In-nies jaraw. In-nies jgħarblu fil-kwiet ta’ darhom. Jaraw x’inhu tajjeb u x’inhu ħażin, imma jiżnu u jħossu min hu ġenwin. Iħossu min għamel l-iżbalji wkoll. Imma n-nies iħossu wkoll minn huwa bitter, min jeżaġera, min anke meta jkollu argument, tant jagħmlu b’mod qares, li jkisser l-argument tiegħu stess. Il-wiegħda tiegħi hija waħda: li fil-ħidma tiegħi u tal-Gvern, mhux se naqgħu f’dak il-livelli. Se nogħlew ‘l fuq. Se nitkellmu fuq il-livell tal-familji, mhux fil-livell tal-qrusa.”
Temm jgħid: “moħħna f’Malta, biex kulħadd jimxi ‘l quddiem”.
