“Nies differenti, riflessivi tas-soċjetà wiesa’ wkoll, però, daqskemm ġejjin minn sferi differenti, imbagħad, jingħaqdu għal għan komuni, dak li għalihom Malta l-ewwel u qabel kollox u l-għan tagħhom se jkun dak li jippromwovu l-interess tal-Maltin. Dawn l-Ewroparlamentari, il-kandidati tagħna tal-Parlament Ewropew huma disa’ kandidati li l-karriera personali tagħhom hi sekondarja għal dik tal-pajjiż; u għalhekk l-importanza li nivvotaw lill-kandidati kollha tal-Partit Laburista.”
Dan kien il-messaġġ li għadda l-Prim Ministru u Mexxej Laburista Robert Abela waqt li kien intervistat mill-ġurnalist ta’ ONE News Samuel Lucas f’Birżebbuġa.
Dr Abela saħaq kif il-kandidati kollha tal-Partit Laburista se jaħdmu favur Malta u żied jinnota kif il-kandidati, għalkemm ġejjin minn sferi differenti fis-soċjetà, għandhom għan komuni li jaħdmu favur pajjiżna.
Hawn ikkuntrasta mal-esponenti Nazzjonalisti fi Brussell li jużaw il-kariga biex javvanzaw il-karriera personali tagħhom.
Il-Prim Ministru kien mistoqsi wkoll dwar l-ekonomija fejn elenka l-importanza li din għandha timxi lejn il-kwalità.
“Kwalità, kwalità, kwalità, però dak id-dibattitu nistgħu nagħmluh u nistgħu nimxu lejn dik id-direzzjoni għax għandna l-basics li huma b’saħħithom. X’jiġifieri? Ma tistax titħaddet dwar kwalità jekk fil-pajjiż ikollok problema ta’ qgħad, kif għandhom ħafna u ħafna pajjiżi fl-Ewropa u lil hinn mill-Ewropa. Aħna f’pajjiżna għandna sitwazzjoni ta’ full employment. Mela, għax għandna dik is-sitwazzjoni, issa nistgħu nitkellmu fuq kif se nkomplu nsaħħu l-kundizzjonijiet tax-xogħol tal-ħaddiema tagħna, fuq kif se noħolqu iżjed opportunitajiet, fuq kif se nħarrġu aktar Għawdxin u Maltin biex dawk l-aqwa opportunitajiet jaħtfuhom huma.”
Il-Prim Ministru tkellem dwar l-inflazzjoni li affettwat l-Ewropa kollha u semma numru ta’ miżuri li offrew stabbiltà fil-kontijiet tal-poplu, fosthom fejn jidħlu l-enerġija u l-ikel.
“L-iprem fattur li rreżista l-inflazzjoni f’pajjiżna kienet l-istabbiltà li tajna fil-prezzijiet tal-enerġija u tal-fuels. Tajna deċiżjoni strateġika ċara sa minn meta bdiet il-pandemija, sa minn meta mbagħad bdew l-isfidi tal-loġistika, sa minn meta mbagħad faqqgħet l-gwerra fl-2022. Imbagħad meta reġa’ kellna t-tensjonijiet fis-7 t’Ottubru li għadda fil-Lvant Nofsani, id-deċiżjoni kienet waħda ċara, kuntrarjament dak li ġara f’pajjiżi oħrajn, li l-prezzijiet tal-enerġija u tal-fuels jibqgħu stabbli – l-uniku pajjiż aħna li rnexxielna nżommu l-prezzijiet tal-enerġija stabbli, ifisser li m’għolew qatt.”
Il-Prim Ministru ma naqasx milli jitkellem dwar l-investiment f’Birżebbuġa, il-lokalità fejn kienet qed issir l-intervista, u l-entużjażmu li qed juru n-nies għall-attivitajiet organizzati mill-Partit Laburista.
“Jien nemmen li dak kien is-sigriet tas-suċċess ta’ dan il-moviment fl-aħħar ħdax-il sena, li konna viċin ir-realtajiet tan-nies, li t-talbiet tagħhom ħdimna biex dawwarnihom fit-twettiq tal-aspirazzjonijiet tagħhom u nemmen li dak irid jibqa’ jkun is-sigriet ta’ dan il-moviment, li nkunu viċin ir-realtajiet tan-nies, li nkunu umli, li nindirizzaw il-ħtiġijiet tan-nies. Fuq kollox it-8 ta’ Ġunju tfisser ukoll l-approvazzjoni ta’ pjanijiet li għandna għal kull wieħed u waħda mill-komunitajiet u lokalitajiet tagħna, dakinhar nagħtu vot b’saħħtu ħafna biex hawnhekk ukoll inkomplu nsaħħu lin-nies ta’ Birżebbuġa u nsaħħu lil Malta tagħna.”
