“Qed ngħinu lin-nies u se nibqgħu nagħmlu dan anke wara t-8 ta’ Ġunju.” Iddikjara dan il-Prim Ministru u Mexxej Laburista Robert Abela f’intervista li saritlu minn Claudia Cushieri waqt il-programm ‘Temi’ fuq ONE Radio.
“Għent lin-nies, qed ngħin lin-nies u lil hinn mit-8 ta’ Ġunju se ngħin lin-nies. Anzi fdat biex nagħmel hekk. Għalhekk l-appell għal vot b’saħħtu fit-8 ta’ Ġunju biex in-nies jagħtuni dik is-saħħa li jien neħtieġ mingħandhom biex inkun nista’ ngħinhom bis-saħħa lura.”
Fl-aħħar jiem qabel jum il-ġudizzju tal-poplu, il-Prim Ministru tenna kif din il-kampanja elettorali kienet waħda li, permezz tagħha, il-Gvern kompla jisma’ u jiltaqa’ man-nies u hekk se jibqa’ jagħmel wara jum l-elezzjoni.
Hawnhekk semma l-ħemel tal-proġetti, riformi u investimenti li wettaq dan il-Gvern fl-aħħar ġimgħat, dejjem favur il-kwalità tal-ħajja tal-Maltin u l-Għawdxin.
Robert Abela nnota kif tul din il-kampanja elettorali, il-Partit Nazzjonalista ddeċieda li jibqa’ jieħu t-triq tal-attakki u n-negattività. Dan filwaqt li hemm min hu moħħu biss biex javvanza fil-karriera personali, fil-gwerer u biex jeħodna fil-passat.
“Jien xtaqt li kellna kampanja fejn inħabbtu l-ideat u jkollna kuntrast tal-policies. Ma ġarax dak sfortunatament. Kellek sitwazzjoni fejn attakki personali kienu kostanti u jaraw lil min se jkissru u min-naħa tagħna tkellimna fuq dak li jrid isir għall-ġid ta’ dan il-pajjiż.”
Fuq ONE Radio, il-Prim Ministru fakkar kif, fl-eqqel ta’ kriżijiet internazzjonali, fosthom bil-pandemija u ż-żewġ gwerer, li għadhom għaddejjin bħalissa, kien Gvern Laburista li ma waqafx jgħin lin-nies u jżomm l-istabbiltà kemm fil-prezzijiet tal-enerġija u anke tal-ikel.
Fakkar ukoll fil-wegħda ta’ dan il-Gvern li, għal kull għaxar minuti minn fejn toqgħod, ikun hemm spazju miftuħ u aħdar. Prijorità oħra hi l-indafa pubblika, fejn il-Gvern investa bis-sħiħ fil-ħaddiema li jagħmlu dan u fir-riżorsi li jintużaw għaż-żamma tal-lokalitajiet tagħna.
Dr Robert Abela temm b’appell ċar biex nhar is-Sibt li ġej kulħadd joħroġ jivvota lill-kandidati kollha tal-Partit Laburista.
“Is-Sibt kulħadd imur jivvota, jivvota kmieni, jivvota lill-kandidati kollha tal-Partit Laburista. Sadanittant appell lil kulħadd, ibqgħu kkonvinċu lin-nies, lil dawk kollha li tafu li għandhom weġgħa ressquhom lejna, nindirizzawhom dawk il-weġgħat, infittxu s-soluzzjonijiet għalihom kemm sa nhar is-Sibt li ġej kif ukoll lil hinn. Dik hi l-wegħda ewlenija li nagħmel lill-poplu tagħna li, kif sabuni viċin tagħhom f’dawn l-aħħar snin, se nibqa’ viċin il-poplu.”
