“Fil-jiem li ġejjin se nibqgħu nuru kif se nagħmlu l-futur ta’ dan il-pajjiż wieħed iktar sabiħ.”
Iddikjara dan il-Prim Ministru u Mexxej Laburista Robert Abela f’rally li ġie organizzat fi Pjazza San Franġisk f’Ħal Qormi t-Tnejn filgħaxija.
Quddiem folla sabiħa ta’ nies mimlija entużjażmu u bl-għajta Malta Flimkien, il-Prim Ministru appella lil kulħadd sabiex niġbdu ħabel wieħed, ħalli mir-Rebbiegħa li ġejja dan il-pajjiż ikun jista’ jkompli t-triq tan-normalità u jissaħħaħ bi prosperità ġdida.
Il-Prim Ministru tenna, “Għalhekk se niddeċiedu fis-26 ta’ Marzu, għax mal-mument li jibda l-isbaħ perjodu għall-familji Għawdxin u Maltin jien irridkom iffokati biss fuq dak li hu għażiż għalikom fil-ħajja ta’ kuljum. Għax il-ħajja sabiħa u rridukom tgawduha. Il-pandemija ħaditilna wisq. Iżda issa nistgħu nħarsu ’l quddiem għax wasal il-mument li ngħixu bl-aqwa mod mill-ġdid.”
Mill-istess post li fih beda l-mixja politika tiegħu ħames snin ilu, Dr Abela rrefera għall-ewwel proposti mħabbra fil-Manifest Elettorali tal-Partit Laburist, fosthom l-investiment massiċċ ta’ seba’ mitt miljun ewro fil-qasam ambjentali.
Robert Abela qal kif Gvern Laburista qatt ma nesa u qatt mhu se jinsa lill-pensjonanti Maltin u Għawdxin.
Fil-fatt hawnhekk huwa wiegħed li se jara kif l-anzjani kollha jkollhom pensjoni ogħla, jitnaqqsulhom il-piżijiet u li anke jieħdu l-mediċini kollha b’xejn.
Abela stqarr, “Se nerġgħu nżidu l-pensjonijiet. Fl-aħħar leġiżlatura żidnihom iktar minn kemm wegħdna. F’din il-leġiżlatura qed ngħidulkom bil-quddiem li se nagħtu żieda ikbar. Il-mira tagħna hi li nagħtu d-doppju ta’ dak li kellna fl-aħħar manifest. U jekk inkunu nifilħu li nagħtu aktar, tafu li hekk nagħmlu. Magħna tafu fejn qegħdin.”
Gvern Laburista se jibqa’ jippremja l-bżulija, u għalhekk se jerġa’ jnaqqas it-taxxa għall-ħaddiema kollha.
Ir-rata tat-taxxa se tonqos ukoll għan-negozji Maltin.
F’messaġġ ta’ mexxej b’viżjoni, Robert Abela qal kif din se tkun kampanja elettorali fejn il-Partit Laburista se juri biċ-ċar kif f’dan il-pajjiż kulħadd jista’ jilħaq l-aspirazzjonijiet tiegħu.
Liż-żgħażagħ Maltin u Għawdxin, Robert Abela waslilhom messaġġ pożittiv, iżda mhux lilhom biss.
Il-Mexxej Laburista qal, “Hekk, hekk tibda l-kampanja elettorali tagħna. Mhux bi tfigħ ta’ tajn, imma bil-proposti dwar kif se nagħmlu futur isbaħ u iktar b’saħħtu. Dawn huma proposti b’saħħithom. Proposti tal-uniku moviment tal-progress f’pajjiżna. Proposti ta’ Partit li jemmen fikom għax ġej minnkom. Proposti ta’ tim magħqud li jħobb lil pajjiżu u li jrid ikompli jaħdem għal-pajjiż u għalikom.”
Ma naqasx li l-Prim Ministru jsemmi l-proposta kruċjali tal-first time buyers ta’ elf ewro ħlas mill-Gvern fuq self kull sena għall-għaxar snin.
F’diskors li jħares lejn il-futur u mhux lejn il-passat, il-Prim Ministru qal kif il-Partit Laburista huwa l-partit li għandu l-kreddibilita biex iwettaq dak li jwiegħed, u dan jixhdu l-implimentazzjoni ta’ għexieren ta’ miżuri u riformi li diġà ħallew differenza pożittiva f’ħajjet in-nies.
Dr Abela tenna, “Issieħbu fil-kampanja tagħna. Għax tagħna hi kampanja tal-għaqda. Tagħna hi l-kampanja ta’ min iħobb. Tagħna hi l-kampanja ta’ min ma jibżax mill-bidla. Il-bidla, li nistgħu nġibuha biss flimkien. Għax Maltin Flimkien se nsebbħu l-irħula u bliet tagħna. Maltin Flimkien se nħallu aktar flus fil-bwiet tagħkom. Maltin Flimkien se nsostnu iktar lin-negozji. Maltin Flimkien se nagħtu aktar serħan il-moħħ lill-anzjani tagħna. Maltin Flimkien se nwettqu l-ħolm taż-żgħażagħ tagħna. Maltin flimkien. Il-futur sabiħ.”
