Il-Malta Enterprise qed tistieden lill-pubbliku biex il-Ġimgħa filgħaxija tmur għall-kunċert ‘One Love, Celebrating Peace’, li se jsir f’Gwardamangia.
Dan il-kunċert se jiġi organizzat b’risq iċ-ċittadini Ukreni li ħarbu minn pajjiżhom u ġew Malta minħabba t-tbatija tal-gwerra. Se jinġabru wkoll fondi għall-bini ta’ skola sekondarja fl-Etjopja, b’tifkira ta’ Rebecca Zammit Lupi, li din is-sena tilfet il-battalja tagħha kontra l-kanċer neta kellha biss 15-il sena.
F’dan il-kunċert se jkun hemm mistiedna speċjali, Jamala, ir-rebbieħa tal-Eurovision Song Contest tal-2016 f’isem l-Ukrajna. Hija ġejja Malta biex tkanta favur il-paċi, f’tentattiv biex in-nies isiru jafu aktar dwar dak li għaddej minnu pajjiżha.
ONE News żar il-post fejn se jsir dan il-kunċert u hemmhekk iltaqa’ mad-direttur artistiku, Elton Zarb. Huwa spjega xi preparamenti qed isiru u x’se nkunu qed nistennew.
Qal, “Bażikament, bħalissa qed jintrama l-istage u jintrama fejn se jkun qed isir il-kunċert għada. Se jkollna ħames artisti Maltin: għandna lil Petra, Gaia, Ryan Hili, Aidan, u Claudia Faniello. Se jkunu akkumpanjati minn kittarist, se jagħmlu acoustic set, bil-kitarrist Kirsten Graham u, in between, se jkollna l-host DJ Steve Vee.”
Minbarra l-kunċert, il-Malta Enterprise se torganizza wkoll wirja fotografika. Il-wirja se tkopri l-perspettiva ċivili ta’ gwerer kontinwi u reċenti. Antoinette Cefai, l-Uffiċjal tal-Komunikazzjoni Esterna tal-Malta Enterprise, qalet li l-Malta Enterprise għamlet din l-esebizzjoni biex tkompli tkabbar l-għarfien dwar diversi gwerer u se tkun miftuħa għal ġimgħatejn.
Stqarret, “Bażkament, il-kunċett proprju huwa l-kunċett tal-umanità fil-gwerra. Din hija parti mill-ħsieb tal-Malta Enterprise, fejn aħna dedikati wkoll għal dak li jisejjaħ corprote social responsability, jiġifieri li nagħtu xi ħaġa iktar lis-soċjetà tagħna.”
Min jixtieq jibbukkja għal dan il-kunċert jista’ jagħmel dan minn fuq is-sit visitmalta.com jew jixtri l-biljetti fil-bieb. Min jixtieq jagħti donazzjoni jista’ jidħol fuq il-paġna ta’ Facebook ta’ dan l-avveniment: ‘One Love, Celebrating Peace’.
