“Se jkollna futur sabiħ għax se naħdmu bħala poplu wieħed ta’ Malta Flimkien.”
Sostna dan il-Prim Ministru u Mexxej Laburista Robert Abela f’intervistà fuq ONE Radio, fejn hawnekk wassal messaġġ ċar ta’ għaqda u rispett tul il-kampanja elettorali kollha.
Robert Abela qal kif fil-ġimgħat li ġejjin m’hemmx lok għal mibegħda, imma hemm biss lok għal diskussjoni fuq x’pajjiż irridu għal uliedna.
Il-Prim Ministru tenna, “Jekk ħaddieħor diġà għażel it-triq tal-partiġjaniżmu, aħna diġà wrejna li rridu nagħżlu t-triq fejn nuru kif il-Maltin u l-Għawdxin jistgħu jkunu ponn wieħed biex jaqilbu kull sfida f’opportunità.”
Il-Mexxej Laburista tenna li l-għażla fis-26 ta’ Marzu, hija għażla bejn il-futur u l-passat.
Abela qal, “L-għażla hija għażla bejn il-passat u l-futur, aħna l-futur. Jekk nibnux fuq il-ħafna tajjeb illi diġà sar fl-aħħar disa’ snin u nagħmlu aktar fid-disa’ snin li ġejjin jew nissugrawx li nafdaw it-tmexxija f’idejn min żgur iħott dak li ġa sar tajjeb f’pajjiżna l-aħħar snin.”
Fuq ONE Radio l-Prim Ministru spjega kif Gvern Laburista implimenta miżuri kbar li għamlu differenza f’ħajjet in-nies, u b’ton ta’ determinazzjoni huwa wiegħed li baqa’ aktar x’jiġi implimentat.
Sabiex iseħħ dan, Dr Abela talab il-fiduċja tan-nies.
Il-Mexxej Laburista stqarr, “Fadal ħafna u ħafna iżjed x’nimplimentaw. Għal dak għandna bżonn il-fiduċja tan-nies għax hija l-fiduċja li tista’ tissiġilla dan il-futur importanti għall-pajjiżna. Il-futur mhux biss nivvutaw għalih imma l-appell tiegħi għal dawk kollha li qed isegwuna li diġà ħadu d-deċiżjoni li jivvutaw lill-PL, biex f’dawn it-33 ġurnata jikkonvinċu kemm jifilħu nies u qed nagħmillhom dan l-appell minn qalbi biex jikkonvinċu kemm jifilħqu nies għal futur b’saħtu għal uliedna u pajjiżna.”
Għal dawk li għadhom indeċiżi, Robert Abela waslilhom dan il-messaġġ.
Abela qal, “Ħdimna fuq il-ħafna tajjeb illi kien hemm f’dawn l-aħħar sentejn, fejn stajna nirranġaw ħdimna biex intejbuh u għalhekk hemm dan il-kunsens wiesa’. Imma imbagħad għande numru ta’ nies li jgħidu lilna ma smajtuniex biżżejjed, jew stajtu smajtuna iżjed. Dawn huma weġgħat li rridu nisimgħuhom, ma nistgħu nissuppervjaw anzi nimxu fuq il-prinċipji li aħna umli man-nies u l-weġgħa trid tinstema’.”
Il-Prim Ministru qal kif il-Partit Laburista qatt ma sab is-sodda mifruxa, imma għax tul is-snin wettaq dak li wiegħed u issa qed juri lin-nies li għandu l-aktar pjan ambizzjuż, jixraqlu l-fiduċja tan-nies.
Fl-intervista, Dr. Robert Abela qal kif il-ħames snin li ġejjin għandhom ikunu mmarkati minn emfasi fuq il-kwalità tal-ħajja tan-nies.
Intant, hawnhekk huwa għamel referenza wkoll għall-ewwel proposti mħabbra mill-Manifest Elettorali tal-Partit Laburista, fosthom dawk b’rabta mal-ambjent, it-tnaqqis fit-taxxi, iż-żieda fil-pensjonijiet u l-proposta kruċjali għall-first time buyers.
