L-emendi għall-Att dwar il-Protezzjoni tal-Embrijun li mistennija jitressqu fil-Parlament din il-ġimgħa se jinkludu bidliet li permezz tagħhom aktar persuni se jkunu jistgħu jsiru ġenituri permezz tal-IVF.
Sal-lum, nisa li għal xi raġuni ma jistgħux jipproduċu bajd jew irġiel li ma jistgħux jipproduċu sperma huma awtomatikament esklużi milli qatt jistgħu jaċċessaw l-IVF. Iżda fost l-emendi li se jitressqu se jkunu hemm id-donazzjoni ta’ ċelloli tal-bajd u sperma.
Nisa li jkunu se jużaw donazzjoni ta’ bajd għall-IVF jistgħu jużaw l-IVF sakemm jagħlqu l-età ta’ 48 sena. Dan ifisser illi ser ikun hemm żieda fl-età sakemm mara tista’ toħrog tqila bl-IVF. Min-naħa l-oħra n-nisa li jkunu jridu jagħtu donazzjoni ta’ bajd jistgħu jagħmlu dan sakemm jagħlqu 36 sena. Dawn huma deċiżjonijiet li jittieħdu fuq pariri xjentifiċi u l-probabbiltajiet li l-proċess ikun wieħed suċċess. B’din il-bidla se tkun qed titla’ b’ħames snin l-età massima li fiha mara tista’ tgawdi mill-IVF jekk kemm-il darba tgawdi mid-donazzjoni ta’ bajd ta’ mara li hi iżgħar fl-età.
Il-bidliet li jintroduċu d-donazzjonijiet tal-bajda jew l-isperma mhumiex bidliet li se jolqtu b’mod pożittiv biss lill-komunità gay li għall-ewwel darba se tgawdi bħall-kumplament tas-soċjetà minn dan is-servizz. Iżda, jgħinu wkoll familji fejn l-omm jista’ jkun li għandha diffikultajiet ta’ saħħa u ma jkunx possibbli għaliha li tipproduci l-bajd.
F’kumment li ta lill-gazzetta KullĦadd id-Deputat Prim Ministru u Ministru għas-Saħħa, Chris Fearne qal li jemmen li l-emendi għal-liġi tal-Protezzjoni tal-Embrijuni se twassal għal diskussjoni sana fil-Parlament u anke fost is-soċjetà ċivili.
“Meta fil-bidu ta’ din is-sena waqt attività tajna ġieħ lill-ewwel 100 wild bl-IVF minn kemm ilu jsir f’Mater Dei, kont aktar minn qatt qabel persważ li għandna jkollna liġi li tirrifletti aktar l-avvanzi tax-xjenza biex jiġu megħluba problemi tal-infertilità u dan biex aktar persuni jkunu jistgħu jkollhom il-grazzja li jkunu ġenituri,” qal id-Deputat Prim Ministru Chris Fearne.
Kien il-Prim Ministru li żvela f’Marzu li għadda, meta l-Partit Laburista kien qed jiċċelebra Jum il-Ħelsien, li l-Grupp Parlamentari Laburista kien appoġġja b’mod unanimu dak propost mid-Deputat Prim Ministru.
Intant kemm ilha ssir l-IVF f’Mater Dei mill-2015 sal-lum twieldu total ta’ 119-il tarbija. Minkejja dan, ma kinux darba u tnejn l-okkazjonijiet li kien hemm min ikkampanja għal bidliet bil-għan li l-programm ikun wieħed iktar inklussiv bil-Prim Ministru jiddikjara fl-aħħar ġimgħat li jistenna li dawn il-bidliet iqajmu diskussjoni fejn min jgħid li huma wisq u min jgħid li mhumiex biżżejjed. Li hu żgur hu li l-bidliet se jagħtu lil iktar familji Maltin iċ-ċans li jkollhom l-ulied.
