Mis-sena skolastika li jmiss, il-Gvern se jsaħħaħ l-istipendji f’oqsma li joffru karrieri u li huma meħtieġa għal pajjiżna.
Ħabbar dan il-Prim Ministru u Mexxej tal-Partit Laburista f’attività oħra ta’ Robert Abela qalb in-nies, din id-darba fil-Pjazza tal-Mellieħa.
Hawnhekk il-Prim Ministru qal kif se titwettaq riforma biex qabel xejn, l-istudenti jsibu xogħlijiet ta’ kwalità.
“Dis-sena skolastika se nibdew inżidu b’mod sostanzjali dawk il-korsijiet li magħhom għandhom abbinat salarju ogħla, stipendju ogħla, kemm qed nitkellem dwar l-MCAST kif ukoll l-Università, li se ninċentivaw studenti li jagħżlu dawk il-linji ta’ karriera, dawk il-korsijiet ta’ studju, li jagħmlu sens għalihom, għas-soċjetà tagħna, għal pajjiżna, li wieħed jaqbad karriera fihom, jipprovdu jobs stabbli u karrieri ta’ kwalità.”
Il-Prim Ministru, Robert Abela
Fil-pjazza tal-Mellieħa li għadha kemm ġiet inawgurata wara proġett ta’ riġenerazzjoni b’investiment ta’ kważi żewġ miljun ewro, il-Prim Ministru semma l-importanza li f’pajjiżna jkollna komunitajiet b’saħħithom.
Ma naqasx li hawnhekk jitkellem dwar il-ħidma tal-Gvern din il-ġimgħa, fosthom it-tnedija tal-istrateġija dwar l-iżvilupp reġjonali ta’ Għawdex għall-għaxar snin li ġejjin, u l-inċentivi biex lil dawk li jibqgħu fil-forzi dixxiplinati, titjibilhom bil-kbir il-pensjoni.
“Nistgħu nitkellmu fuq il-futur u ma nillimitawx ruħna għall-preżent għaliex konna aħna l-Partit fil-Gvern li lil Għawdex qajjimnih ekonomikamet, li f’Għawdex ġibna x-xogħol u x-xogħol ta’ kwalità, u ġewwa Għawdex ħloqna x-xogħol għall-Għawdxin f’Għawdex stess.”
Il-Prim Ministru, Robert Abela
Robert Abela qal kif dan jixhed kif il-Partit Laburista huwa bil-provi l-moviment tal-ħaddiem, li jaħdem biex il-pajjiż jibqa’ miexi ’l quddiem.
Fuq kollox il-Prim Ministru qal kif ma’ dan il-Gvern, taf fejn qiegħed għax dak li jwiegħed, iwettqu.
“Il-Partit aħna li mill-istagħġnar ekonomiku ġibna dik tagħna, waħda mill-aktar ekonomiji li qegħdin jikbru fl-Ewropa. Dan ma ngħidux jien, qalitu sal-bieraħ stess l-aġenzija ta’ kreditu Fitch Ratings, li qaltilna li l-ekonomija ta’ pajjiżna hija A+. Malta A+.”
Il-Prim Ministru, Robert Abela
Dr Abela nnota l-inkonsistenza tal-Oppożizzjoni Nazzjonalista, li qal kif din mhix ċara fl-ideat tagħha, fosthom fejn tidħol l-enerġija.
Huwa semma bosta oqsma oħra li l-Gvern huwa impenjat li jkompli jsaħħaħ, fosthom dak tat-trasport, tal-kostruzzjoni u tal-impjiegi.
Fil-Mellieħa, il-Prim Ministru temm b’messaġġ b’saħħtu ta’ Gvern li mhux se jieqaf jinvesti fin-nies.
“Se nibqgħu nagħtu l-viżjoni u d-direzzjoni lejn fejn irridu naraw lil Malta u Għawdex tagħna jimirħu fl-għaxar snin li ġejjin. Deċiżjoni favur li kulħadd jaħdem għall-ġid komuni. Il-ġid li minnu tgawdi s-soċjetà kollha. Il-ġid li minnu jgawdu l-ħafna u mhux il-ftit. Dan il-pajjiż, aħna għandna fiduċja kbira fih, fl-abbiltajiet tal-ħaddiema tiegħu. Aħna għandna fiduċja sħiħa f’dan il-pajjiż li rridu naħdmu biex ikun wieħed iktar ġust. Dan il-pajjiż li rridu nkomplu nsaħħuh. Dan il-pajjiż li rridu nkomplu nsebbħuh u nagħmlu dan għall-Għawdxin u għall-Maltin kollha.”
Il-Prim Ministru, Robert Abela
