Se jiġu rrestawrati partijiet mill-Victoria Lines

Se jsiru xogħlijiet ta’ restawr ukoll fuq dawk il-partijiet tal-Linji Victoria li jgħaddu mill-perimetru tal-ġnien u li għandhom ħsara. Fortunatament, f’postijiet fejn il-ħitan waqgħu, il-materjal oriġinali għadu jinstab fuq is-sit. F’xi żoni oħra hemm ġebel mhux tqil mibnija b’teknika differenti għall-istil oriġinali. Hawnhekk, il-ħajt irid jerġa’ jinbena bl-użu ta’ l-istess materjali, daqs tal-ġebel u teknika bħal fil-partijiet oriġinali tal-Linji Victoria. Dan jiżgura li l-uniformità tal-Linji tiġi rrispettata. Il-graffiti sprejjati fuq il-faċċata ta’ barra tal-fortifikazzjonijiet se jitneħħew ukoll.

Ix-xogħlijiet fil-ġonna ta’ 23,700 metru kwadru jinkludu wkoll ir-rijabilitazzjoni tal-passaġġ eżistenti u l-installazzjoni ta’ bankijiet u dwal ġodda. Se jiġi introdott ukoll gazebo u żona ta’ logħob tat-tfal. Biex tkun żgurata s-sigurtà għall-viżitaturi, il-ġibjun eżistenti se jkun kopert u tip ta’ lqugħ se jkun installat fil-ġenb tal-ġnien li jħares lejn it-triq.

Ix-xogħol se jkun qiegħed isir mid-Direttorat tar-Restawr fi ħdan il-Ministeru għall-Ġustizzja, Kultura u Gvern Lokali mmexxi mill-Ministru Owen Bonnici u mid-Direttorat tal-Parks fi ħdan il-Ministeru għall-Iżvilupp Sostenibbli, l-Ambjent u t-Tibdil fil-Klima mmexxi mill-Ministru Jose Herrera.