F’Paceville f’San Ġiljan, se jiġu nstallati 40 kamera tas-sigurtà għal aktar sigurtà u sorveljanza. Dawn il-kameras se jiġu nstallati f’żoni differenti, b’investiment mill-Aġenzija LESA, filwaqt li se jiġu mħaddma mill-Korp tal-Pulizija. Dan hekk kif twettqet wegħda oħra mill-baġit.
B’hekk, f’Paceville, se jkun hemm sorveljanza f’kull ħin tal-ġurnata – anke fis-sajf – perjodu fejn eluf ta’ persuni jiffrekwentaw dawn l-inħawi.
Din hija parti minn katina ta’ inizjattivi li huma maħsuba biex jipprevenu l-kriminalità, bi prevenzjoni u b’intelligence led-policing.
Dawn il-kameras ħa jkunu tat-tip PTZ u bullet cameras – b’footage li jista’ jintuża fl-eventwalità li jkun hemm bżonn.
Ir-rata ta’ kriminalità hija fost l-aktar baxxi qatt irreġistrati – minkejja l-gideb u l-miżinformazzjoni tal-Partit Nazzjonalista.
“Il-Partit Nazzjonalista ħareġ jgħid li żied is-serq fid-djar. Kieku mqar qraw ir-rapport il-Crime Report li joħroġ kull sena, kienu jaraw li fl-aħħar sentejn pajjiżna kellu l-inqas rata ta’ serq mid-djar. Fi tnax-il sena naqset kważi b’nofs u hija gidba tal-Partit Nazzjonalista lii jipprova jbezza’.”
Il-Ministru Byron Camilleri
B’kollox, huma maħsuba li jitwaħħlu madwar 160 kamera f’daqqa, fil-lokalitajiet ta’ Raħal Ġdid, San Pawl il-Baħar u l-Marsa – fix-xhur li ġejjin.
Fil-fatt, dawn iż-żoni ntgħażlu bi studju minn kriminlogu, b’kollaborazzjoni mal-Korp tal-Pulizija.
“Qed nindirizzaw ir-realtajiet ta’ Paceville. Sorveljanza 24/7 li se jwasslu biex il-Korp tal-Pulizija jieħdu azzjoni immedjata, real-time intelligence li tasal għandhom u jkunu jistgħu jieħdu azzjoni fuq kull illegalità li se tkun qed issir.”
Il-Ministru Byron Camilleri
Ħadna r-reazzjoni wkoll ta’ Philip Fenech, li huwa ċ-Chairman tat-Town Centre Management f’Paceville, li spjega kif pajjiżna għandu dik li hi msejħa purple flag – marbuta ma’ postijiet ta’ divertiment.
“Din hija waħda mir-requests li jkollna dawn il-cameras, u għalhekk inkunu qed inżommu mal-compliance. Għandna lista ta’ compliance li rridu nimxu magħha, u għalhekk dawn il-cameras huma ta’ importanza kbira.”
Philip Fenech
