Claudine-Ann Sant Fournier u l-bank Pilatus wieġbu mhux ħatja għall-akkużi relatati ma’ ħasil ta’ flus.
Huma dehru quddiem il-Qorti ppreseduta mill-Maġistrat Joe Mifsud il-Ħamis waranofsinhar.
F’isem il-bank Pilatus deher Stefan Camilleri minn PWC bħala l-persuna kompetenti maħtura mill-Awtorità Maltija għas-Servizzi Finanzjarji, l-MFSA biex iħares l-affarijiet tal-bank.
Il-Prosekuzzjoni kienet immexxija mis-Supretendent Frank Tabone, mill-Ispetturi Claire Borg u Pauline Bonello, assistiti minn Cinzia Azzopardi Alamango u Marthese Grech mill-Uffiċċju tal-Avukat Ġenerali.
L-Ispettur Pauline Bonello mit-Taqsima tar-Reati kontra l-Ħasil ta’ Flus spjegat li f’Novembru tal-2018 infetħet inkjesta Maġisterjali fir-rigward tal-operat tal-Pilatus Bank.
Illum din l-inkjesta hija konkluża u l-investigazzjonjiet tal-Pulizija huma magħluqa.
Hija spjegat ukoll li esperti u l-Maġistrat fl-inkjesta idderiġew il-Pulizija u l-Avukat Ġenerali jieħdu passi fil-konfront tal-bank.
Bonello spjegat ukoll li fil-5 ta’ April ġiet arrestata Claudine-Ann Sant Fournier dwar investigazzjoni ta’ ħasil ta’ flus.
Minn dak iż-żmien hija kienet fuq police bail u sarulha erba’ interrogazzjonijiet biex tara u tiċċekja ma’ dokumenti voluminużi.
Bonello rrimarkat li l-akkużata dejjem użat id-dritt tas-silenzju u żiedet li llum l-investigazzjonijiet huma konklużi.
Għalhekk il-Prosekuzzjoni talbet għall-iffriżar tal-assi fil-konfront tal-Bank Pilatus u Claudine-Ann Sant Fournier, liema talba għalija d-Difiża tal-bank u Sant Fournier opponew.
Dwar din it-talba l-Ispettur Pauline Bonello ntalbet sabiex twieġeb xi mistoqsijiet mid-Difiża kemm ta’ Claudine-Ann Sant Fournier u anke tal-bank Pilatus.
Fil-fatt, Bonello wieġbet li Sant Fournier, ma rċevitx flus apparti l-flus tal-paga.
Mistoqsija għaliex intalbet it-talba għall-iffriżar tal-assi, l-Ispettur Pauline Bonello stqarret li meta persuna li qed tiġi akkużata b’ħasil tal-flus, il-Prosekuzzjoni temporanjament għandha titlob talba għall-iffriżar tal-assi.
L-Ispettur ikkonfermat li Claudine-Anne Sant Fournier m’għadiex Direttur tal-bank u li ttieħdet id-dokumentazzjoni kollha mill-bank sabiex ġew esebiti fl-inkjesta separata li ntemmet.
Id-Difiża ta’ Sant Fournier u anke tal-bank sostnew li din it-talba mhiex f’lokha.
Dan għaliex fil-konfront ta’ Sant Fournier din qatt ma rċeviet flus illegali u dwar il-bank, il-flus li għandu ma jista’ jagħmel xejn bihom apparti li jħallas l-multi u servizzi professjonali.
Minn naħa tagħha Dr Cinzia Azzopardi Alamango mill-uffiċċju tal-Avukat Ġenerali argumentat li l-liġi tgħid li tal-inqas f’każijiet hekk anke jekk temporanjament, l-assi għandhom jiġu ffriżati.
Wara l-argumentazzjoni tal-partijiet differenti, il-Qorti fil-konfront tal-bank laqgħet it-talba għall-iffriżar tal-assi.
Fil-konfront ta’ Claudine Sant Fournier, il-Qorti ppreseduta mill-Maġistrat Joe Mifsud ma laqgħetx it-talba għall-iffriżar tal-assi madankollu żammet l-assi tagħha ffriżati temporanjament sakemm u jekk il-Prosekuzzjoni tiddeċiedi li tappella.
F’każ li l-Uffiċċju tal-Avukat Ġenerali jagħżel li jappella hija tkun intitolata żżomm €13,000 fis-sena.
Id-difiża talbet lill-Ispettur Pauline Bonello fuq talba għall-ħelsien mill-arrest.
Mistoqsija mill-Avukat Stefano Filletti li qed jirrapreżenta lil Claudine-Ann Sant Fournier dwar is-silenzju tal-imputata, Bonello qalet li Sant Fournier għażlet li l-argumentazzjoni tagħha għandha sseħħ fil-Qorti.
Quddiem il-Qorti, id-difiża sejħet lil missier l-imputata Claudine Sant Fournier, John Zammit u lil zitha Victoria Galea.
Id-Difiża staqsithom mistoqsijiet ta’ natura personali u li fuq suġġeriment tal-Qorti ma nistgħux nirrappurtaw dwarhom.
Huma aċċettaw li jkunu garanti fil-konfront tal-imputata.
Malli dehret Galea quddiem il-Qorti, l-imputata dehret viżibbilment emozjonata u nfaqgħet tibki.
Il-Prosekuzzjoni minn naħa tagħha oġġezzjonat għat-talba tal-ħelsien mill-arrest ta’ Sant Fournier fuq il-bażi ta’ natura serja tal-każ.
Il-Prosekuzzjoni qalet ukoll li jekk it-talba tal-ħelsien tintlaqa’ għandu jkun hemm ristrezzjonijiet strinġenti.
Wara l-argumentazzjoni taż-żewġ partijiet dwar it-talba għall-ħelsien mill-arrest il-Maġistrat Joe Mifsud fakkar li l-Qrati skont iċ-ċirkostanzi quddiemhom dejjem ippruvaw joħolqu bilanċ.
Huwa tenna li wara li l-Qorti semgħet ukoll ir-raġunijiet personali tal-imputata u diversi sottomisjonijiet oħra, qed tagħti l-ħelsien mill-arrest.
Dan b’kundizzjoniji, li ma ssifirx, li tidher għal kull att tal-proċess, li ma tkellimx jew tavviċina lix-xhieda tal-Prosekuzzjoni, li ma tikkomettix l-ebda delitt, li tirrapporta fl-għassa ta’ Tas Sliema, it-Tnejn, l-Erbgħa u l-Ġimgħa, li tibqa’ f’darha bejn l-10pm u ma toħroġx qabel is-6am u li jekk tibdel l-indirizz tad-dar tinforma lill-Pulizija.
Il-ħelsien mill-arrest sar fuq depożitu ta’ €10,000 u garanzija personali ta’ €40,000.
