L-atleta Samuele Andolina se jkun qed jissielet biex, f’isem Malta, jikseb it-titlu Ewropew Pro tal-World Kickboxing Network (WKN) fil-K1 Rules. Din il-ġlieda se ssir nhar is-Sibt 1 ta’ Diċembru fi Franza.
Andolina, Taljan ta’ 23 sena, se jkun qed jirrappreżenta lil Malta hekk kif ilu diversi snin jgħix f’pajjiżna, fejn jitħarreġ il-kickboxing fi ħdan il-klabb Ying Yang – Team Noel. Fi Strasburgu huwa se jkun akkumpanjat mill-kowċ tiegħu Noel Mercieca u l-assistent kowċ Terence Cilia.
Andolina se jiġġieled bout ta’ K1 5×3 f’livell professjonali. Fit-taqtigħa għat-titlu huwa se jkun qed jiffaċċja lill-avversarju Franċiż Akram Hamidi; atleta rikonoxxut li rebaħ mhux biss fl-Ewropa, imma anki fit-Tajlandja. Il-ġlieda bejn Andolina u Hamidi se tkun l-avveniment ewlieni tas-serata li se tittella’ fir-Rotunda Gym ta’ Strasburgu.
Din mhux l-ewwel darba li Andolina se jkun qed jirrappreżenta lil Malta fi Franza, hekk kif f’Mejju tas-sena li għaddiet iffaċċja avversarju minn Kuba u ħareġ rebbieħ.
Intant, fid-9 ta’ Diċembru li ġej, f’Malta se jkunu qed jittellgħu għall-ewwel darba l-kampjonati nazzjonali tal-kickboxing mill-Assoċjazzjoni Maltija tal-Kickboxing (MKBA), li ġiet rikonoxxuta uffiċjalment minn SportMalta din is-sena.
L-atleti li jirbħu t-titli nazzjonali se jkunu qed jiffurmaw parti mit-tim nazzjonali Malti u se jikkompetu f’kampjonati dinjin. Il-kampjonati nazzjonali se jkunu qed isiru fil-Padiljun Sportiv ta’ Kordin.
