Sal-ġimgħa d-dieħla, l-Aġenzija Ewropea tal-Mediċini, l-EMA, se tkun qed tlesti r-rakkomandazzjonijiet tagħha sabiex tapprova l-vaċċin tal-Pfizer BioNTech kontra l-Covid-19, li huwa għat-tfal.
Dan intqal f’konferenza tal-aħbarijiet il-Ħamis wara nofsinhar, fejn intqal kif dan il-vaċċin li jinsab quddiemhom huwa għal dawk it-tfal bejn il-ħames snin u ħdax-il sena.
F’din il-konferenza tal-aħbarijiet intqal ukoll kif il-ġimgħa li għaddiet, l-Aġenzija Ewropea għall-Mediċini daħlitilha applikazzjoni tal-vaċċin tal-Moderna għal dawk bejn is-sitt snin u ħdax-il sena.
Fil-konferenza ntqal ukoll li hekk kif riesqa x-xitwa madwar l-Ewropa hemm żieda fl-infezzjonijiet tal-Covid-19 u hemm żidiet ta’ pazjenti li kellhom jiddaħħlu fl-isptarijiet minħabba l-Coronavirus.
L-EMA qalet li l-maġġoranza tal-każijiet huma ta’ persuni mhux imlaqqma.
Intqal kif huwa importanti li kulħadd jieħu d-doża addizzjonali u s’issa hemm approvati żewġ tilqimiet, dawk tal-Pfizer u Moderna u qed jingħataw għal dawk li għandhom ’il fuq minn 18-il sena.
L-EMA qalet li l-akkademiċi sabu li huwa tajjeb meta xi ħadd ikun ħa l-ewwel żewġ dożi ta’ kumpanija, waqt li d-doża addizzjonali tkun ta’ kumpanija oħra.
Intqal kif sal-aħħar ta’ dan ix-xahar se joħroġ studju dwar jekk wieħed jistax jieħu d-doża addizzjonali qabel jgħaddu s-sitt xhur.
L-EMA qalet li hija qed tevalwa l-ħames vaċċin tan-NOVAVAX, sabiex din tkun approvata fiż-żmien li ġej.
Din it-tilqima issegwi l-erba’ tilqimiet approvati mill-istess aġenzija, li huma tal-BioNTech Pfizer, Moderna, AstraZeneca u Johnson & Johnson.
