Sal-aħħar ta’ Ġunju, il-popolazzjoni Maltija mistennija tilħaq l-immunità għall-virus tal-Covid-19.
Dan stqarru d-Deputat Prim Ministru u Ministru għas-Saħħa Chris Fearne waqt konferenza tal-aħbarijiet.
Fearne spjega wkoll li sal-festa ta’ Santa Marija il-poplu Malti u Għawdxi kollu se jkun ġie offrut minn tal-inqas l-ewwel doża tat-tilqima tal-Covid-19.
Qal, “Persuni ‘l fuq minn 50 sena l-mira tagħna hu li nkunu laqqaminhom sat-tielet ġimgħa tax-xahar li ġej. Il-persuni ta’ fuq l-40 sena se noffrulhom l-ewwel doża sal-ewwel ġimgħa ta’ Ġunju imbagħad wara dak il-grupp se noffruha lill-poplu fuq sittax-il sena. Il-pjan hu li sa Santa Marija nkunu offrejna t-tilqima lill-poplu Malti u Għawdxi kollu.”
Id-Deputat Prim Ministru semma kif pajjiżna se jilħaq tragward, tliet xhur qabel.
Spjega, “Din hija mira ambizzjuża, mira li se tressaq ‘l quddiem bi kważi erba’ xhur il-miri li konna għamilna ftit tax-xhur ilu bieb b’hekk inkunu wieħed mill-ewwel pajjiżi li nkunu lħaqna l-herd immunity li minn Settembru se timxi mill-aħħar ta’ Settembru għall-aħħar ta’ Ġunju.”
Waqt il-konferenza tal-aħbarijiet spjega li dawk kollha vulnerabbli jew għandhom iżjed minn sittin sena, inbagħtilhom l-invit għat-tilqima.
Fuq twitter, il-Prim Ministru Robert Abela nnota dak li kien għadu kif ħabbar il-Gvern dwar il-programm ta’ tilqim.
Qal li dan se jsaħħaħ lill-pajjiżna biex jirritorna gradwalment lejn in-normalità.
Matul il-jum tas-Sibt tnedew ukoll żewġ sistemi ġodda li bihom persuni se jkunu jistgħu jitfgħu isimhom sabiex jieħdu l-vaċċin.
Fearne spjega li mis-Sibt, persuni ‘l fuq minn ħamsin sena jistgħu jibagħtu SMS bin-numru tal-karta tal-identità biex eventwalment jintbagħtilhom appuntament bil-lokalità fejn se jieħdu l-vaċċin.
Tnediet ukoll app online li biha dawk li jgħixu Malta se jkollhom ukoll il-faċilità li jagħżlu jekk jieħdux il-vaċċin fit-tramuntana, ċentru jew nofsinhar tal-pajjiż.
Qal, “Ladarba tirreġistra ħa tirċievi SMS biex jikkonferma ir-reġistrazzjoni imbagħad wara ftit ġranet se tirievi SMS ieħor bl-appuntament ta’ meta u fejn se tieħu t-tilqima”
Kien spjegat ukoll li mis-Sibt se tinfetaħ ukoll ir-reġistrazzjoni mat-tobba tal-familja.
Spjega, “Minn issa se niftħu r-reġistrazjzoni mat-tobbba tal-familja. jekk għandek 50 sena ‘l fuq tista tirreġistra għandna jew tagħżel li tmur għand it-tabib privat tiegħek. Il-vaċċin bla ħlas imma ovvjament imbagħad il-pazjent jagħmel l-arranġament mat-tabib tiegħu.”
