Għaddej id-dibattitu bejn l-erba’ kontestanti għat-tmexxija tal-Partit Nazzjonalista.
Dan f’mument fejn il-Partit Nazzjonalista jinsab maqsum u saħansitra l-Kunsill Amministrattiv talab lil Delia jirtira l-kandidatura. Peró Delia qed jieħu sehem fid-dibattitu ma’ Frank Portelli, Chris Said u Alex Perici Calascione. Hawn isfel mumenti ewlenin.
22.21 Chris Said kien qed jitkellem dwar is-sussidjaretà u Frank Portelli intervjena biex qallu li minflok il-proċess kollu mar f’idejn it-tesserati, mar l-ewwel f’idejn il-kunsillieri. Kontra s-sussidjaretà qal Portelli li iktar kmieni reġa’ tkellem fuq korruzzjoni fil-qasam taż-żejt u kif għax tkellem dwar hekk seta’ kien li l-gvern ta’ Lawrence Gonzi ma ftiehemx fuq l-isptar St Philips.
22.15 Alex Perici Calascione ddefenda l-kandidatura tiegħu billi qal li kellu suċċess fl-amministrazzjoni finanzjarja tal-Partit Nazzjonalista, anke jekk il-PN huwa iktar midjun minn qabel.
22.11 Adrian Delia qal li mhux se jkollu problemi jgħaqqad il-partit u mistoqsi jekk kienx naïve li ma ddikjarax il-każi li ħarġu fil-media dwaru, Adrian Delia qal li le. Adrian Delia qal li hu għex il-ħajja u għalhekk kellu esperjenza tal-ħajja u tax-xogħol u ra problemi żgħar u problemi kbar. F’battuti ċari lejn Chris Said qal: “In-nies id-dar ma jinteressahomx kif jaħdem il-partit.”
Kien dan l-argument li uża biex jiddefendi ruħu mill-fatti li ħarġu dwaru fl-aħħar ġimgħat. Qal li ma riedx jidħol f’dawn l-istejjer hekk kif Delia deher jibdel it-tattika u jitkellem mill-inqas dwar dak li qed jitfa’ dell ikrah fuqu.
22.06 Frank Portelli qal li kien hemm kunsillier li qallu li mhux se jivvotalu għax kixef il-korruzzjoni fi żmien in-nazzjonalisti fil-gvern u tenna li hu għandu l-prinċipji tiegħu u se jżomm magħhom.
Minn naħa ta’ Chris Said u Alex Perici Calascione tkellmu fuq il-ħtieġa ta’ għaqda fil-partit u filwaqt li Perici Calascione qal li se jikkunsidra l-proposti tal-kandidati l-oħra interrompih Portelli u qallu: “Jien m’għandiex proposti, wegħdiet għandi. Proposta waħda għamilt lill-mara.”
Adrian Delia qal li bejn dak li jingħad u dak li jidher mhux effetivament l-istorja tal-partit bħalissa u fetħilha fuq dak li ġara mill-Kunsill Amministrattiv li talbu jirtira l-kandidatura.
21.47 Kurt Sansone staqsa lil Adrian Delia dwar il-kummenti ta’ Simon Busuttil li indikaw b’mod ċar li ma jridux kap. Kummenti simili saru wkoll minn Jason Azzopardi u Sansone rrefera għalihom u qal kif jista’ jaħdem magħhom u jgħaqqad lill-partit.
“Ma nikkummentax fuq Jason Azzopardi għax ma narax il-kummenti tiegħu. Imma għamel kampanja personali kontriha,” qal Delia li sellem lil Simon Busuttil.
“Nirrispetta l-opinjoni tiegħu. Peró nirrispetta iktar ir-rieda tal-ħafna kunsillieri tagħna,” qal Delia.
Intant, kien mitlub jgħid ukoll kif se jidħol fil-parlament. Iżda, dik id-domanda evita għal kollox u ma weġibix, filwaqt li ntilef fir-retorika.
21.38: F’interventi oħra kien hemm ripetizzjonijiet ta’ argumenti li saru fl-aħħar ġimgħat. Frank Portelli mħasseb dwar il-ħin tad-dibattitu u jiċċekjah minn ħin għal ħin filwaqt li qal ukoll: “Jien l-iktar wieħed popolari anke mal-laburisti. Ma jibżgħux minni. Għax jien sod imma ġust,” qal Portelli.
Portelli żied: “Jien inwiegħed mingħajr costings. Hemm is-surplus”
21.33 Mistoqsi minn Matthew Vella dwar id-dejn li għandu b’rabta mal-isptar St Philips, Frank Portelli fetħilha kontra l-maltatoday. “Intom mhux veru indipendenti,” qal Frank Portelli li nnota kif il-kumitat tal-etika tal-Partit Nazzjonalista ħareġ stqarrija li għandu fiduċja 100%. Dan hu l-istess kumitat li kkundanna lil Adrian Delia. Intant, Frank Portelli hawn żvela li qed jinnegozja biex ibigħ l-isptar St Philips. “U għall-ewwel darba nispiċċa b’surplus,” qal Frank Portelli.
21.28 Chris Said kien mistoqsi dwar għaliex il-Partit Nazzjonalista ma rebaħx Għawdex wara li hu nħatar biex jikseb dan il-għan u hawn reġa’ ġab l-iskuża tal-power of incumbency, filwaqt li qal li ħaddiema f’Għawdex ma jridu jagħmlu xejn. “Il-bajja maħmuġa għax hemm tmien ħaddiema ma jridu jagħmlu xejn,” qal Chris Said li fetħilha kif il-power of incumbency kien wieħed mir-raġunijiet ewlenin tat-telfa tal-Partit Nazzjonalista.
“Immorru bil-corrupt practices għand magistrat u nitolbu investigazzjoni,” qal Chris Said.
21.23 Adrian Delia kien mistoqsi minn Rachel Attard ta’ The Malta Independent dwar l-audit li qal li se jagħmel dwar il-finanzi tiegħu. Peró minflok wieġeb dwar l-audit tiegħu infexx jgħajjar lill-Ministru Konrad Mizzi u ċ-chief of staff tal-Prim Ministru, Keith Schembri.
21.21: Alex Perici Calascione kien mistoqsi dwar id-dikjarazzjoni li wara l-ittra anonima dwaru hemm id moħbija u l-fatt li semma kif dan mhux mod ġdid, botta ċara lejn Adrian Delia. “Ċara li id moħbija,” qal Alex Perici Calascione. Żied li l-id hija moħbija wkoll minħabba ż-żmien użat.
“L-agħar forma ta’ espressjoni, ittra anonima, li tiktibha id moħbija,” qal Perici Calascione.
Dwar id-dikjarazzjoni jekk li dan mhux mod ġdid kien qed jgħid lejn Adrian Delia, Perici Calascione prova jaħrabha u qal li l-kandidati kollha qed isemmu t-tiġdid.
21.15: Id-dibattitu bejn il-kandidati għat-tmexxija tal-Partit Nazzjonalista beda bil-mistoqsija dwar jekk il-Partit Nazzjonalista għadux relevanti u Chris Said fetħilha mill-ewwel bil-battuti lejn Adrian Delia.
Said qal: “Il-Partit Nazzjonalista relevanti għax bħalissa kulħadd jitkellem dwar il-Partit Nazzjonalista.”
Kien hawn li ġew il- battuti lejn Adrian Delia. “L-uniku establishment li għandna fil-pajjiż huwa dak ta’ Kastilja,” qal Said li wieġeb għal kummenti ta’ Adrian Delia fl-aħħar sigħat li l-establishment fil-Partit Nazzjonalista ma jridux.
