Is-Santa Sede ħatret lill-Monsinjur Professur Hector Scerri bħala membru tal-Kummissjoni Internazzjonali Konġunta għad-Djalogu Teoloġiku bejn il-Knisja Kattolika u dik Ortodossa.
Dan tħabbar fi stqarrija mill-Arċidjoċesi ta’ Malta, fejn intqal li l-Professur Scerri għandu 58 sena u ilu Konsultur tad-Dikasteru għall-Promozzjoni tal-Għaqda fost l-Insara mill-2014.
Intqal li huwa professur tat-teoloġija dommatika u tal-ekumeniżmu fil-Fakultà tat-Teoloġija fl-Università ta’ Malta, u l-President tal-Kummissjoni Ekumenika tal-Arċidjoċesi ta’ Malta u tal-Kummissjoni Dottrinali tal-Konferenza Episkopali Maltija.
Il-Kummissjoni Internazzjonali Konġunta ilha tiltaqa’ mill-1980 sabiex iġġib ’il quddiem id-djalogu teoloġiku bejn il-Knisja Kattolika u l-Knisja Ortodossa.
Preżentement hi mmexxija mill-Kardinal Kurt Koch, Prefett tad-Dikasteru għall-Promozzjoni tal-Għaqda fost l-Insara u l-Metropolita Ġob ta’ Pisidja f’isem il-Patrijarkat Ekumeniku ta’ Kostantinopli.
