Sal-aħħar tas-sena, pajjiżna ser ikollu 362 charging point pubbliku għal sidien ta’ karozzi elettriċi sabiex ikunu jistgħu jiċċarġjaw il-batteriji tagħhom.
Dan hekk kif f’konferenza tal-aħbarijiet bit-tema ‘Malta li Rridu għal Uliedna’ tħabbar li sal-aħħar tas-sena se jkunu tpoġġew 130 charging pillar ġdid b’invesiment ta’ tliet miljun ewro
Fl-istess konferenza, il-Ministru għall-Enerġija, l-Intrapriża u l-Iżvilupp Sostenibbli, Miriam Dalli spjegat kif il-130 charging pillar joffru żewġ charging points kull wieħed biex b’hekk dan ifisser li b’kollox se jkunu disponibbli 260 charging point ġdid.
Minn dawn il-130 charging pillar, 108 minnhom se jkunu dawk magħrufa bħala Medium Charging pillars filwaqt li l-bqija jiġifieri 22 se jkunu Fast Charging Pillars.
Sidien li jiċċarġjaw il-vetturi tagħhom f’Medium Charging pillars se jkunu qed iħallsu b’rata ta’ ftit inqas minn €0.17-il centeżmu għal kull unit f’ħinijiet fejn id-domanda ma tkunx għolja filwaqt li jħallsu kważi €0.19-il ċenteżmu f’ħinijiet fejn id-domanda tkun għolja.
Intant għal dawk li jużaw il-Fast Charging pillars f’ħinijiet fejn id-domanda ma tkunx għolja, dawn se jħallsu kważi €0.18-il ċenteżmu għal kull unit. F’ħinijiet fejn id-domanda tkun għolja dawn se jħallsu kważi €0.20 ċenteżmu għal kull unit.
Fil-konferenza tal-aħbarijiet intqal li dawn ir-rati huma fost l-orħos fl-Unjoni Ewropea.
Il-ħinijiet fejn id-domanda ma tkunx għolja, magħrufa bħala Off-peak, huma bejn nofsillejl u s-sitta ta’ filgħodu, bejn nofsinhar u l-erbgħa ta’ filgħaxija u tul il-ġurnata kollha tal-Ħadd.
Il-Ministru Dalli qalet, “Bis-sistema li nidejna llum is-sewwieqa li jridu jiċċarġjaw l-vettura tagħhom se jkunu qed iħallsu biss għal dawk il-units li jikkunsmaw għaliex mhux ħa jkunu qed iħallsu xi registration fee jew xi spiza inizzjali oħra. Nemmnu li b’dan il-mod qed inkunu nagħmluha aktar faċli u aktar affordabbli biex is-sewwieqa tagħna jeqilbu għal karozzi li ma jniġġsux.”
Intant ġie spjegat ukoll li 56 charging pillar li diġà hemm madwar il-gżejjer Maltin se jiġu aġġornati sabiex jiddaħħlu f’sistema ġdida.
Din is-sistema tinkludi mobile app bl-isem ‘Charge My Ride’ biex il-pubbliku jkun jista’ jinqeda b’aktar effiċjenza. Fost affarijiet oħra din tkun qed tavża lis-sid tal-vettura meta l-karozza tkun laħqet it-tmenin fil-mija taċ-charging biex jilħaq jasal sa fejn il-vettura mal-mument li din tlesti tiċċarġja.
Din l-app tavża wkoll lis-sid malli l-vettura tkun ġiet iċċarġjata kollha filwaqt li mappa interattiva turi liema huma l-eqreb charging pillars disponibbli sabiex jiġi evitat skariġġ żejjed.
Preżenti għal din il-konferenza attenda wkoll il-Ministru għat-Trasport, Ian Borg.
Huwa tenna kif din il-miżura tikkumplimenta oħrajn imħabbra mill-Gvern biex ikompli jitnaqqas it-tniġġis mill-mezzi ta’ trasport differenti f’pajjiżna: “Irridu ngħidu l-grants li għandna biex nies jeqilbu meta jagħmlu l-għażla tagħhom fix-xiri tal-karozza. Għandna wkoll it-trasport pubbliku li mhux biss se ntuh b’xejn imma ħa naraw li l-flotta tat-trasport pubbliku, il-flotta tal-karozza tal-linja tkun taħdem bl-elettriku wkoll.”
Intant is-Segretarju Parlamentari Stefan Zrinzo Azzopardi nnota l-importanza tal-fondi Ewropej sabiex pajjiżna jkun jista’ jagħmel qalba fil-qasam tat-trasport: “Permezz ta’ fondi tal-Unjoni Ewropea se nkunu qed naraw investiment biex ngħinu aktar lis-settur privat jixtru l-vetturi tagħhom permezz ta’ grants u jkun hemm aktar vettturi elettriċi, il-qalba u l-bidla ta’ vetturi fis-settur pubbliku lejn dawk li huma vetturi elettriċi.”
