Sa Jannar li ġej, kważi nofs il-popolazzjoni fir-Renju Unit se jkollha tħallas aktar minn 10 fil-mija tal-paga tagħha f’kontijiet tal-enerġija.
Tkellem ma’ ONE News dwar dan l-analista finanzjarju Steve Ellul, b’reazzjoni għall-aħbar li l-prezzijiet tal-enerġija u l-gas fir-Renju Unit żdiedu bi tmenin fil-mija.
Fil-fatt, ir-regolatur tal-enerġija għar-Renju Unit, Ofgem, qal li l-konsumaturi Brittanniċi f’Ottubru, se jkollhom iħallsu aktar minn €4,200 fis-sena f’kontijiet meta mqabbel mal-ftit inqas minn €2,000 li qed iħallsu bħalissa.
Dan kawża tal-invażjoni Russa fl-Ukrajna hekk kif ir-Russja, qed taqta’ l-provvista tal-gas għall-Ewropa.
Fl-isfond ta’ dan kollu, fir-Renju Unit l-inflazzjoni b’mod ġenerali mistennija titla’ għal 13 fil-mija fix-xhur li ġejjin.
L-analista finanzjarju Steve Ellul spjega li din is-sitwazzjoni mistennija tiggrava aktar tant li, f’Jannar, il-kontijiet tal-enerġija fir-Renju Unit mistennija jlaħħqu l-5,000 lira sterlina, jiġifieri kważi €6,000 fis-sena.
Ellul osserva kif, kawża ta’ dan, aktar nies fir-Renju Unit se jaqgħu taħt l-indikatur hekk imsejjaħ tal-‘energy poverty’, Indikatur li jiġbor fih persuni li jkollhom iħallsu aktar minn 10 fil-mija tal-paga tagħhom, għall-kontijiet tal-enerġija.
“Huwa stmat li, biż-żidiet li qed jaraw fir-Renju Unit, sa Jannar li ġej nofs il-popolazzjoni ġewwa r-Renju Unit se tkun qiegħda f’dan l-‘energy poverty index’, jiġifieri se jkollok nofs il-popolazzjoni li mhux se tkun kapaċi, bis-salarju tagħha, bid-dħul tagħha, issaħħan b’mod adegwat fix-xitwa ġewwa r-Renju Unit, id-djar tagħha.”
Ellul spjega wkoll kif dan se jwassal biex ħafna konsumaturiBrittanniċi jkollhom jagħżlu jsaħħnux darhom fix-xitwa minflok jixtru affarijiet essenzjali bħall-ikel.
Qal ukoll li n-nuqqas ta’ deċiżjonijiet importanti ta’ sostenn mill-Gvern Brittaniku quddiem dan kollu qed iwassal mhux biss għal sitwazzjoni ta’ riċessjoni, iżda agħar minn hekk.
“Fuq livell ekonomiku, fir-Renju Unit qed naraw li dawn iż-żidiet fil-kontijiet tad-dawl u l-ilma, essenzjalment anke fil-kontijiet tal-enerġija, qed iwasslu għal dak li huwa ‘stagflation’: riskju mhux biss ta’ riċessjoni biss imma li jkollok andament ekonomiku kajman ħafna jew saħansitra ċokon fl-ekonomija, imma li magħha jkollok ukoll żieda fl-inflazzjoni, kif qed naraw fir-Renju Unit, fejn qed naraw żieda fl-inflazzjoni li issa qabżet l-10 fil-mija u anke żieda f’dak li huwa l-qgħad.”
Intant, hekk kif rapporti qed jiddeskrivu l-Gvern Brittaniku bħala ‘Zombie Government’ wara li mhu qed jagħmel xejn biex jintervjeni sabiex itaffi dan il-piż minn fuq il-familji, Ellul irrimarka dwar is-sitwazzjoni differenti ta’ Malta.
Dan hekk kif filwaqt li Malta mhux eċċezzjoni għaż-żieda fl-inflazzjoni, il-Gvern qed jagħmel minn kollox biex din iżommha taħt kontroll.
Dan huwa l-każ għax il-Gvern, fost oħrajn, qed jerfa’ hu l-piż taż-żidiet fil-prezzijiet tal-enerġija u l-fjuwils.
Huwa spjega l-effetti ta’ dan fuq l-ekonomija.
“Il-prodotti li nimmanifatturaw fil-fabbriki tagħna, il-proċessi li nużaw fl-agrikoltura, kollha jiddependu mill-enerġija dawn, u allura l-prezz tagħhom jiżdied b’mod awtomatiku. Il-mument li jiżdiedu l-prezzijiet tal-elettriku, jiġifieri l-inflazzjoni, l-impatt fuq l-għoli tal-ħajja jkun mhux biss minħabba żieda fil-costs tal-enerġija imma minħabba r-ripple effect li dik iż-żieda jkollha fuq setturi l-oħrajn kollha ġewwa pajjiżna.”
