Sal-ewwel ġimgħa ta’ Ġunju se jkunu jistgħu jinfetħu għat-traffiku t-toroq li bħalissa qed isir fihom il-proġett ta’ riġenerazzjoni tal-bajja tal-Għadira, li jinvolvi wkoll il-bini mill-ġdid tat-triq u l-promenade tul il-bajja.
Ħabbret dan l-aġenzija tal-Gvern Infrastructure Malta waqt konferenza għall-ġurnalisti li fiha ġiet spjegata ħidmet din l-aġenzija f’dan il-proġett.
Proġett li qed isir b’investiment ta’ madwar tmien miljun ewro, b’kollaborazzjoni ma’ diversi entitajiet, f’żona li kienet ilha ma tara investiment ‘il fuq minn 30 sena.
L-aġenzija spjegat li l-interventi li qed isiru f’dan il-proġett jinvolvu infrastruttura li tagħti prijorità lis-sigurtà ta’ dawk li jużawha b’diversi modi, speċjalment għaż-żewġ miljun persuna li jużaw din it-triq bil-pass u bit-trasport pubbliku.
It-triq li kien hemm qabel la kellha bankini u lanqas spazji ta’ parkeġġ adegwgi fuq il-karreġġjata li tagħti għaċ-Ċirkewwa, u b’hekk bosta sewwieqa kienu jipparkjaw il-vetturi tagħhom parzjalment fuq il-korsija tax-xellug b’riskji kbar għalihom u għall-vetturi oħra li jkunu qed isuqu fuq l-istess korsija.
Meta s-sewwieqa u l-passiġġiera kienu joħroġu mill-vetturi tagħhom, ir-riskji li jintlaqtu minn vetturi oħra kien ikun għoli għax kien ikollhom jaqsmu għan-naħa l-oħra tat-triq mingħajr bankina.
Il-Kap Eżekuttiv tal-Infrastructure Malta spjega li l-prijorità kienet li wieħed jimmassimizza l-ispazji tal-parkeġġ minħabba li l-Għadira hija destinazzjoni mfittxija minn ħafna, speċjalment fis-sajf.
B’hekk ġie deċiż illi se jiġu intorodotti 130 spazju ta’ parkeġġ fuq in-naħa tal-bajja.
Dan se jkun qiegħed jikkumplimenta l-parkeġġ li jesa’ madwar 350 karozza, li sar b’investiment ta’ miljun tliet mitt elf ewro.
Ġie spjegat wkoll li l-karreġġjata li tagħti għaċ-Ċirkewwa qiegħda għat-telgħa, u b’hekk kien jagħmel sens li jkun hemm żewg korsiji ħalli wieħed ikun’ jista jgħaddi minn fejn vetturi kbar.
Min-naħa l-oħra, il-karreġġjata li tagħti lejn iċ-ċentru ta’ Malta għandha 500 mitt metru minnha b’korsija waħda, minħabba l-fatt li qiegħda għan-niżla, bil-bqija ta’ triq tkun b’żewġ karreġġjati.
Il-wisa’ totali tal-karreġġjata mis-central strip sal-parking hija ta’ ħames metri u nofs, biex tippermetti li żewġ vetturi kbar jgħaddu biswit xulxin.
Fis-central strip se jitħallew ukoll spazji biex, f’każ ta’ emerġenza, wieħed ikun jista’ jgħaddi t-traffiku għall-karreġjata opposta b’mod ikkontrollat.
Intant, l-Infrastructure Malta ħolqot karreġġjata diretta li se tkun tista’ tieħu lill-vetturi ħerġin minn l-Armier lejn il-karreġġjata diretta lejn iċ-ċentru ta’ Malta.
Bidla oħra ewlenija hija s-separazzjoni tal-bus stops mit-triq.
Il-limitu tal-veloċità tnaqqas ukoll għal 50km fis-siegħa, bil-għan li jitnaqqsu l-inċidenti u tittejjeb is-sigurtà għal kulmin juża t-triq.
Il-Kap Eżekuttiv spjega li l-proġett minn dejjem kien imqassam fuq għoxrin xahar u ma kienx ikun possibbli kieku ma kienx għall-kollaborazzjoni tan-nies.
Huwa żied jgħid li ma kienx proġett faċli għax l-aġenzija ħadmet kontra l-ħin u diversi elementi bħar-riħ, li wasslu biex ittella’ ammont sostanzjali ta’ ramel.
Il-Kap Eżekuttiv qal“Ovvjament, biex nagmlu dan il-proġett ta’ €8 miljun, xtaqna li l-affarjiet bażiċi jkunu hemmhekk. Jien naħseb li hemm bilanċ tajjeb bejn il-konvenjenza u s-siġurtà.”
Intant, it-tielet u l-aħħar fażi tax-xogħlijiet huma skedati li jsiru minn Ottubru li ġej sa Marzu tas-sena d-dieħla, u se jinkludi, fost l-oħrajn, l-installazzjoni ta’ għamara tat-toroq.
