It-team nazzjonali malti tar-Rugby Union illum wara nofs-in sofra l-ewwel telfa tiegħu mir-Rugby Europe Conference meta ġie megħlub minn Iżrael bl-iskor ta’ 16-15 fit-Tony Bezzina Stadium Kordin.
It-team malti kien sfortunat li tilef proprju minħabba penalty ta’ Iżrael fl-aħħar sekondi tal-logħba, meta sa dak il-ħin il-maltin kienu 15-13 minn fuq u dehru resqin lejn it-tileet rebħa infila minn din il-kompetizzjoni.
Kienet logħba b’żewġt uċuħ. L-avversarji bdew tajjeb fl-ewwel taqsima tant li daħlu jistrieħu 6-0 minn fuq.
Iżda l-maltin wettqu reazzjoni qawwija fit-tieni taqsima hekk kif għamlu 15 -il punt. Sat-73 minuta l-iskor kien 15-13 favur Malta, iżda żball tal-maltin wassal għall-penalty fatali fl-aħħar sekondi.
Malta qed tilgħab f’Pool D ta’ din il-kompetizzjoni. Qabel il-logħba tal-lum, Malta rebħet l-ewwel żewġ logħbiet tagħha 42-21 kontra Ċipru u 10-3 kontra Andorra.
