Cristiano Ronaldo uffiċjalment plejer ta’ Manchester United hekk kif il-klabb Ingliż ħabbar li temm l-iffirmar tal-plejer Portuġiż li ngħaqad miegħu mingħand it-tim Taljan Juventus.
Ronaldo reġa’ lura fl-istess klabb li fil-perjodu bejn l-2003 u l-2009 huwa rebaħ tmien tazzi importanti.
It-trasferiment sar komplut wara li l-plejer ta’ 36 sena għamel it-testijiet mediċi, kiseb id-dokumenti neċessarji kif ukoll kien hemm qbil dwar xi termini personali.
Intant, kienu bosta partitarji tal-United li laqgħu r-ritorn ta’ Cristiano Ronaldo hekk kif nhar il-Ġimgħa tħabbar li hu mistenni li jerġa’ jingħaqad mar-Red Devils.
F’kummenti li ta, Ronaldo tenna li hu qed iħares ‘il quddiem biex jerġa’ jilgħab f’Old Trafford mal-klabb li dejjem żammu f’qalbu.
