Kien frott ta’ ħidma ta’ dan il-Gvern li tul dawn l-aħħar erba’ snin raħsu 143 medicina tad-ditta. Dan wara proċess ta’ djalogu mal-importaturi u l-fornituri tal-mediċini. Ir-roħs laħaq is-67% fuq ċertu medicini, u l-konsumaturi frankaw sa €320, fosthom fuq mediċini tal-kanċer.
Sostniet dan il-Ministru għad-Djalogu Soċjali, Helena Dalli, waqt konferenza tal-aħbarijiet fejn fakkret id-diversi kisbiet li għamel dan il-Gvern permezz tal-Awtorità dwar il-Mediċini.
Dalli qalet li sabu Awtorità fejn l-impjegati kienu demotivati, b’sitwazzjoni finanzjarja li sa erba’ snin ilu bilkemm kien hemm flus biex joħroġ is-salarji u b’ilmenti mill-industrija dwar l-Awtorità. Minn hemm sar proċess strutturat sabiex l-Awtorità tiġi fuq saqajha u tkun ċentru t’eċċellenza fl-Ewropa.
Hi spjegat kif issa l-Awtorità, fejn qabel kienet tonfoq miljuni ta’ ewro fuq kiri ta’ propjetà, frankat kwart ta’ miljun ewro fuq medda ta’ tliet snin. Il-Minsitru Dalli fakkret ukoll li ġew introdotti sistemi tal-IT ghal Licenzjar tal-Medicini, IT u finanzi.
Apparti r-roħs fil-mediċina, fost dak li wettaq dan il-Gvern, ġew illiċenzjati numru rekord ta’ prodotti mediċinali, biex illum dawn eċċedew il-5,200. Saru kampanji ta’ għarfien, kemm dwar mediċini ġeneriċi u kif ukoll dwar l-għażla tal-mediċini.
Dalli ħabbret it-twaqqif ta’ unit ġdid fi ħdan l-Awtorità dwar il-Mediċina li se jiffoka fuq ir-riċerka, affarijiet xjentifiċi u innovazzjoni.
Hi qalet kif l-Awtorità ġibdet lejha numru rekord ta’ proċeduri Ewropej għal prodotti mediċinali li ghal ewwel darba fl-Ewropa jigu assessjati minn Malta. Permezz ta’ dan il-proġett inġibdu lejn Malta iktar minn miljun ewro.
Dalli sostniet li issa għandna Awtorità li qed tħares li tibni l-kompetenza għas-settur farmaċewtiku f’Malta. Dan sar wara li ħarġet sejħa t’interess sabiex studenti li jkunu qed jagħmlu dottorat ikunu jistgħu jagħmlu traineeship bi ħlas mal-Awtorità fejn 18 il-professjonist diġà pparteċipaw f’dan il programm.
“Konna xprun fl-Ewropa, anke permezz tal-Presidenza fejn saru numru ta’ inizzjattivi innovativi bħal li ġibna regolaturi Afrikani u Ewropej flimkien għal-ewwel darba u s-summit li sar ilbieraħ stess li kien deskrvit bħala milestone għall-Ewropa minħabba li dawk involuti f’mediċini għal trattamenti rari, tlaqqaw flimkien – għax nemmnu li kull persuna jistħoqqlu jkun stmat u l-bżonnijiet tiegħu jiġu rikonnuxuti,” qal dan il-Ministru Dalli
Inizjattiva ġdida li ħa dan il-Gvern hi l-Malta Laboratories Network, fejn qiegħed jaħdem f’mudell ta’ koperazzjoni ma’ laboratorji pubbliċi u privati bil-għan li dawn il-laboratorji jakkwistaw l-akkreditazzjoni meħtieġa u tiżdied il-kwalità tas-servizz f’konformità mal-istandards Ewropej.
S’issa sar xogħol ma’ laboratorji tal-Gvern u gew iffirmati ħames Memorandum of Understandings bil-għan li f’Malta jinghata servizz ta’ laboratorju xjentifiku kif jixraq, u kif ukoll sar ftehim mal-Water Services Corporation li qed jwassal għall-użu aħjar ta’ tagħmir avvanzat u tax-xjenzjati kwalifikati li jinsab f’dawn il-laboratorji.
Apparti minn hekk, Dalli qalet li, il-Malta Laboratories Network ra l-importanza li jitjieb is-servizz forensiku f’pajjizna u kien ghalhekk li ġie ffirmat ftehim ta’ kollaborazzjoni ma’ laboratorju privat li jispeċjalizza fid-determinazzjoni tad-DNA għall-skopijiet forensiċi. Din il-kollaborazzjoni waslet biex jinfetaħ laboratorju tad-DNA fi ħdan il-Life Sciences Park li huwa post ta’ eċċelenza fl-oqsma tax-xjenza.
Dalli semmiet ukoll investiment ta’ €80,000 f’taħriġ li sar f’Ġunju fi ħdan is-sezzjoni forensika xjentifika tal-korp tal-pulizija, wara l-ftehim li ġie iffirmat ma waħda mill-ogħla istituzzjonijiet forensiċi xjentifici; Netherlands Forensic Institute. Dalli temmet tgħid li l-viżjoni tal-Malta Laboratories Network huwa li jkompli jaħdem ma’ laboratorji xjentifiċi sabiex jottimizzaw il-potenzjal u jissimplifikaw l-operat tagħhom u ssaħħaħ is-sostennibiltà u li l-poplu Malti jingħata s-servizz ta’ laboratorju xjentifiku kif jixraqlu.
