-Kitba tal-Membru Parlamentari Dr Edward Zammit Lewis
M’hemmx dubju li għal dan il-Gvern Laburista, l-isfidi ma naqsux, anzi kienu l-ordni tal-ġurnata! Irridu napprezzaw qabelxejn li minkejja dawn l-isfidi u sfidi oħra li laqtu lil pajjiżna b’mod aktar lokalizzat, Robert Abela, bħala Mexxej u Prim Ministru, kien sod fuq it-tmun tal-pajjiż! Żammejna b’mod tajjeb u konsistenti l-livell ta’ għajxien tagħna, meta wieħed iqabbel ma’ kif marru pajjiżi oħra Ewropej. Dan mhux qed ngħidu jiena, però qed jingħad ukoll minn aġenziji internazzjonali ta’ kreditu u kif ukoll it-tbassir għal dak li huwa tkabbir ekonomiku għal Malta mill-istess Kummissjoni Ewropea.
Irridu nkunu ċari u nibqgħu nisħqu li dak li għaddejjin minnu huwa riżultat ta’ Gvern għaqli li tefa’ l-flus fil-bwiet tan-nies, qassam il-ġid u ħaseb l-aktar għal aktar nies li huma b’xi mod jew ieħor vulnerabbli fis-soċjetà tagħna. Madanakollu, ħaddieħor, tul dan iż-żmien tant kritiku għal pajjiżna, kien aktar medhi fl-attakki personali fuqna l-politiċi Laburisti u sabiex ikattar il-mibegħda f’pajjiżna! Mal-avversarji tagħna u ma’ dawk li ma jinteressahomx mill-ġid komuni, irridu nkunu aktar sodi magħhom, però fl-istess ħin nibqgħu ffokati li noħolqu l-ġid għall-poplu Malti u Għawdxi kollu. Qed ninnota b’sodisfazzjon li Robert Abela qed ikun ferm fuq dan il-binarju! Hekk għandu jkun u ser isib lili u lil ħafna oħrajn warajh.
Huwa hawnhekk li wieħed irid isemmi sondaġġi li saru dawn l-aħħar. Is-sondaġġi huma gwida, però ċertament li mhumiex ‘xi vanġelu.’ L-uniku sondaġġ reali huwa meta l-poplu Malti u Għawdxi jmur sabiex jitfa’ l-vot tiegħu. Dan ma jfissirx li m’għandniex nagħmlu eżerċizzju ta’ awtokritika, anzi bil-kontra. Ma rridux naqgħu fit-tentazzjoni li nwaħħlu f’avveniment jew ieħor, imma naraw sew l-is¬tampa kollha ta’ madwarna u fejn irridu ntejbu b’mod immedjat!
Irrid ngħid li Robert Abela huwa navigatur formidabbli f’baħar ferm imqalleb. Dan ma jfissirx li m’għandux jindirizza sfidi evidenti li għandu quddiemu;
- Ekonomija li tibqa’ għaddejja b’andament b’saħħtu u dan billi jkun hemm ideat innovattivi li jvara l-istess Gvern. Eżempju konkret ta’ dan huwa proġett bħal dak ta’ land reclamation, li jiena ser inkun fuq quddiem li jseħħ fix-xhur li ġejjin;
- Aktar għajnuna lil dawk vulnerabbli u dgħajfa fis-soċjetà tagħna. Dan għaliex m’hemmx dubju li għalkemm sar ħafna sabiex din titrażżan, l-inflazzjoni qiegħda tgħolli rasha. Meta jseħħ hekk, l-aktar li jintlaqtu huma dawk ta’ taħt fis-soċjetà tagħna. Hu appuntu għalhekk li x-xibka ¬soċjali li diġà teżisti trid tissaħħaħ sew. Hu dan li jagħmilna Laburisti u ċjoè li jkun hemm distribuzzjoni ġusta tal-ġid, li dejjem ngħinu lill-batut u li nagħtu opportunitajiet lil kulħadd, ġej minn fejn ġej, sabiex jimxi ’l quddiem;
- Ambjent aħjar u politika konsistenti dwar dan fejn isir investiment kbir;
- Pajjiż aktar organizzat fejn ikun hemm aktar infurzar effettiv u li ma jħares lejn wiċċ ħadd;
- Grupp Parlamentari u Kabinett aktar effettiv u li kollha kemm huma ssibhom meta jiġi l-iebes;
- Amministrazzjoni pubblika li tkun aktar effettiva u li min jieħu karigi, inklużi CEOs ta’ entitajiet, ikunu hemm sabiex jieħu d-deċiżjonijiet u jagħmlu dan b’mod għaqli favur il-ġid komuni u konformi mal-politika tal-Gvern.
Jekk niffokaw fuq dawn il-binarji, ma nfallux. Però rridu nxammru l-kmiem sew! Ma baqax żmien! Il-Gvern Laburista taħt Joseph Muscat u Robert Abela għamel tant ġid mal-poplu Malti u Għawdxi! F’għaqda u fejn huwa importanti li nħaddnu politika li ninvolvu lil kulħadd u kulħadd huwa importanti fil-Partit fi rwoli varji, NASLU! M’hemmx dubju li Robert Abela ser ¬iwettaq dan. Konvint!
