Il-Bank of Valletta ħabbar ir-riżultati tiegħu għall-ewwel sitt xhur tas-sena li għalqu fit-30 ta’ Ġunju. Il-profitt qabel il-provvedimenti għal-litigazzjoni jammonta għal €88.5 miljuni, li huwa 30% ogħla mis-€67.8 miljuni rreġistrati għall-istess perjodu s-sena l-oħra, u fil-fatt huwa l-ogħla profitt għal nofs is-sena li qatt ġie rrapportat mill-Grupp. Il-Grupp irreġistra profitt qabel it-taxxa ta’ €13.5 miljuni, wara li għaraf provvediment għal-litigazzjoni ta’ €75 miljun.
Id-dħul totali għal-Grupp, li jinkludi l-marġini tal-imgħax, spejjeż u dħul mill-kummerċ, laħħaq il-€127.9 miljuni, mqabbel mal-€115.5 miljuni tas-sena l-oħra, jiġifieri żieda ta’ 11%. L-ispejjeż inżammu taħt kontroll, b’żiedu ta’ 2% biex laħqu t-€63.9 miljuni. Il-Grupp ibbenefika wkoll minn titjib fil-kwalità tal-kreditu tal-loan book tiegħu, li wassal biex il-Bank irkupra l-provvedimenti kontra l-impairment ta’ €20.2 miljuni.
Ir-riżultati kienu impattati minn provvediment ta’ €75 miljun kontra telf potenzjali minn każijiet litiġuzi li nqalgħu tul is-snin u li fihom hu involut il-BOV. Il-Bord tad-Diretturi iżomm dawn il-każijiet taħt skrutinju kontinwu biex jevalwa l-pożizzjoni tal-Bank minn żmien għal żmien fid-dawl ta’ żviluppi kif iseħħu. Jekk l-izviluppi hekk jesigu, il-Bord ser jieħu il-miżuri neċessarji skont it-tibdil fiċ-ċirkustanzi, inkluż provvedimenti adegwati. Dawn il-provvedimenti jittieħdu mingħajr preġudizzju, u bl-ebda mod ma jikkostitwixxu ammissjoni ta’ ħtija jew responsabbiltà da parti tal-Bank.
Is-self lill-klijenti jibqa’ l-akbar assi fuq il-balance sheet tal-Grupp, u dan is-settur wera tkabbir sodisfaċenti, l-aktar fis-settur tas-self fuq id-djar. L-immaniġjar tad-depożiti tal-klijenti kien ukoll fil-mira tal-Bank, peress li inħass li dan kien meħtieġ f’perjodu twil ta’ rati ta’ imgħax baxx. Filwaqt li d-depożiti retail komplew jikbru b’mod sostnut, id-depożiti tal-kumpaniji naqqsu. Illum, id-depożiti totali mal-Bank jammontaw għal €10 biljuni.
Is-Sur Deo Scerri, Chairman tal-BOV, spjega li l-Bord, bħal dejjem, huwa ffukat biex jiżgura l-istabbiltà u s-sostenibbilità fit-tul tal-Grupp. Dan qed nagħmluh billi nibnu buffers ta’ kapital b’saħħithom u billi nżommu taħt skrutinju kontinwu l-mudell tan-negozju. F’dan il-kuntest, il-Bord iddeċieda li ma jiddikjarax dividend interim, u mhux ser ikun qed jirrakkomanda dividend finali fi flus kontanti. “Billi jerġa’ jinvesti l-profitt minflok ma jħallsu fi flus kontanti, il-pożizzjoni kapitali tal-Bank se tkompli tissaħħaħ, kif jixraq lil bank li huwa meqjus bħala istituzzjoni sistematikament importanti għal Malta minn regolaturi internazzjonali,” qal iċ-Chairman.
Fl-istess waqt, il-Bord qed jimplimenta programm ta’ ristrutturar fin-negozju tal-BOV bil-għan li jnaqqas il-profil tar-riskju tal-Bank. Dan huma programm fuq perjodu medju li ser jara lil Bank inaqqas jew itemm certu linji non-core fin-negozju tiegħu u kif ukoll relazzjonijiet li mhux qegħdin fil-qalba tal-aptit tar-riskju tal-Bord, jew fejn ir-riskju meħud mhuwiex ikkumpensat b’mod adegwat mid-dħul ġenerat.
Is-Sur Scerri stqarr li “ż-żewġ strateġiji ta’ konservazzjoni tal-kapital u tnaqqis fir-riskju tal-mudell tan-negozju huma għodda li se jiżguraw futur sigur, sostenibbli u profitabbli għall-BOV.” Huwa kkonkluda billi rringrazzja lill-istakeholders kollha, inkluż il-klijenti, l-azzjonisti u l-impjegati għall-appoġġ kontinwu u l-impenn tagħhom lejn il-Bank.
