Fit-tieni jum ta’ tlielaq, il-Ġimgħa 25 ta’ Ottubru, fil-FIA Motorsport Games għal din is-sena f’Valencia, assistejna għal sensiela ta’ riżultati diversi, li fil-qofol tagħhom huma pożittiv għal Team Malta.
Minkejja tfixkil sinifikanti minħabba ħsara fis-sistema tal-ibbrejkjar tiegħu, Nicky Gauci, konkorrent formidabbli fil-kategorija F4, wera reżiljenza notevoli. Il-prestazzjoni tiegħu kienet imxekkla. Madankollu, irnexxielu jispiċċa l-ewwel tiġrija ta prattika fit-tnax il-posizjoni. Anke bit-tajers mikula ħafna fit-tieni prattika, huwa ma qatax qalbu, u temm is-sessjoni tiegħu fid-dsatax il-post.
Fil-Karting Endurance, l-isforz kollettiv ta’ Team Malta, magħmul minn Micah Scicluna, Ryan Borg, u Ella Zammit, kien evidenti hekk kif kisbu l-5 pożizzjoni fost il-pajjiżi kollha li qed jipparteċipaw f’din id-dixxiplina.
Jacob Micallef, talent promettenti fil-Karting Sprint Senior, kellu pole position fil-grupp tiegħu u spiċċa fit-tieni post. Il-prestazzjoni tiegħu llum, fejn ser jibda mit-tieni post tagħtina tama għat-tiġrijiet futuri tiegħu.
Fl-Esport, Keith Camilleri ffaċċja sfidi mhux mistennija hekk kif inħareġ waqt it-tiġrijiet tal-kwarti tal-finali. Madankollu, Dean Vella se jkun qed jikkompeti fit-tellieqa tas-semifinali llum.
Ayrton Jon Tonna, li qed jieħu sehem fil-Karting Mini, ikkwalifika P9 fil-grupp tiegħu u P17 fost 40 sewwieq. Tonna jibda b’sessjoni ta’ prattika u wara żewġ heats illum. Huwa jinsab fi grupp A u se jkun qed jibda minn P9 fil-heats kollha.
Benji Westwood, li ħa sehem fil-Karting Sprint Junior, ikkwalifika P8 fit-tieni grupp, u ser jkun P15 għall-heats illum.
Ir-riżultat ġenerali għal Malta, meta jitqiesu r-riżultati kollha, huwa l-10 post.
