Tlett ijiem biss wara li tħabbar l-Budget għas-sena d-dieħla u li nkluda fih l-inċentiv ta’ €12,000 biex jimbotta x-xiri ta’ vetturi elettriċi jew plug-in hybrid, bosta nnutaw kif din l-inizjattiva qajmet interess kbir.
Iż-żieda ta’ €3,000, li bdiet tgħodd mill-għada tal-Budget, waslet biex in-nies marru fix-showrooms tal-karozzi u b’interess jikkunsidraw xiri ta’ vetturi li tniġġes inqas.
ONE News żar showroom partikolari fi Blata l-Bajda sabiex jistħarreġ l-interess li kien hemm b’rabta ma’ dan l-inċentiv.
Hemmhekk tkellimna ma’ Alex Tanti hekk kif spjegalna li fl-aħħar jiem od-domanda b’rabta ma’ xiri ta’ karozzi plug-in hybrid jew elettriċi, żdiedet sew. Huwa qalilna, “Besides li kellna iktar xogħol u minbarra li aktar nies ġew bil-ħajra kellna anke nies li jsaqqsu speċifikament għal hybrid u electric. Fejn qabel kien hemm ċertu interess issa specifically aiming towards the electric.”
Huwa tenna wkoll is-sodisfazzjon tiegħu għal inċentivi oħra li se jinċentivaw ix-xiri ta’ dawn it-tip ta’ vetturi ħbieb tal-ambjent: “Issa specifically ġiet mention li l-Gvern qed jippjana li jitwaħħlu aktar charging points. Li tiffaċilita s-serħan tal-moħħ għal min qed jixtri, li jkun jaf li jekk irid oltre milli jiċċarġja fil-garage jew id-dar imma isib other ways how to charge it out.”
Intant Gilbert Agius minn Transport Malta sostna li d-domandi b’rabta ma’ din l-inċentiv fl-aħħar jiem fnew il-linji tat-telefon ta’ Transport Malta. Huwa spjega wkoll li dawk kollha li applikaw għall-iskema l-antika ta’ qabel il-Budget u li għadhom ma rreġistrawx il-vettura tagħhom, se jkunu qed jiġu nnotifikati biex japplikaw mill-ġdid ħalli jaqgħu taħt l-iskema l-ġdida li tiffrankalhom sa €3,000 oħra.
Agius tenna wkoll li fl-aħħar sigħat Transport Malta għamlet kuntatt ma’ importatur li ġie rappurtat li fl-aħħar jiem għolla l-prezz ta’ karozza partikolari b’elfejn ewro biex b’hekk il-konsumatur ma jgawdix b’mod sħiħ miż-żieda fl-inċentiv tal-Budget: “Dan huwa ksur ta’ liġi jiġifieri u kontra anke l-prezzijiet u l-prezzijiet li jistabbilixxi s-suq. Inti ma tistax tgħolli l-prezzijiet għaliex il-Gvern qed jagħti iktar. Il-konsumatur jippretendi li l-Gvern qed jagħti iktar il-prezz tal-vetturi jonqos.”
