L-iżvilupp propost fl-eks sit tal-Istitut għall-Istudji Turistiċi ħa bidla oħra hekk kif il-grupp DB ressaq reviżjonijiet sostanzjali fil-pjan tiegħu għal proġett tad-DB City Centre.
Il-proġett kien tħabbar fl-2017 f’dak li kien imsejjaħ bħala l-ikbar investiment Malti fl-istorja ta’ pajjiżna, iżda kien qajjem oġġezzjonijiet kbar minn għaqdiet u residenti tal-lokalitajiet tal-madwar.
Fil-fatt il-permess li kien ingħata fl-2018 kien ġie revokat mill-bord tal-appell tal-Awtorità tal-Ippjanar sena ilu.
Fir-reviżjonijiet tiegħu li qed iressaq issa l-grupp DB naqqas iż-żona li se tkun żviluppata b’50,000 metru kwadru u żied l-ispazji pubbliċi b’seba’ t’elef metru kwadru.
Tnaqqsu wkoll l-għoli tal-lukanda u tat-torri filwaqt li l-ispazju bejn iż-żewġ binjiet żdied b’mod konsiderevoli.
Il-binja tal-ITS mhix se tintmess u se tkun inkorporata fil-proġett filwaqt li mhu se jsir l-ebda skavar taħt din il-binja.
Il-proġett mistenni jara wkoll li jagħmel użu massimu mill-mina ta’ Paceville li se tkun qed tinbena billi t-traffiku ‘l barra mill-bajja ta’ San Ġorġ se jkun qed jgħaddi minn din il-mina.
Fil-pjanijiet tiegħu l-grupp DB għamilha ċara li l-proġett mhux se jolqot l-Għar ta’ Ħarq Ħamiem hekk kif se jkun hemm spazju ta’ erbgħa u għoxrin metru bejn l-għar u l-iżvilupp. Dan filwaqt li nofs perċentwal biss tal-proġett kollu se jkun mibni direttament fuq l-għar.
Biex jindirizza l-kritika tar-residenti ta’ Pembroke li l-iżvilupp se jdallam l-akwati tal-lokal, il-grupp qal li l-proġett se jżid biss disgħin minuta ta’ dellijiet fix-xitwa u 30 minuta fis-sajf.
Il-grupp fakkar li ħallas sittin miljun ewro għas-sit, l-ogħla prezz qatt imħallas għal kull metru kwadru għal proġetti ta’ dan it-tip fl-aħħar 20 sena. Semma li dan il-prezz intlaħaq wara analiżi minn kumpanija tal-awdituri u kkonfermat bħala prezz ġust mill-Awditur Ġenerali.
Dan filwaqt li l-grupp ħallas mal-miljun u nofs ewro f’fondi li jistgħu jgħinu lil-lokal billi jitwettqu proġetti bħal parkeġġ għar-residenti, spazji miftuħa ġodda kif ukoll kameras tas-sigurtà.
Semma wkoll li qed jinvesti €250 miljun ewro u li se jiġġenera man-nofs biljun ewro fi dħul lill-Gvern filwaqt li joħloq mal-1,200 impjieg ġa la darba l-proġett ikun lest.
Madanakollu dawn ir-reviżjonijiet ma niżlux tajjeb ma’ dawk li qed jopponu l-proġett hekk kif tliet kunsilli lokali u għaxar għaqdiet fi stqarrija qalu li l-proġett ma jindirizzax it-tħassib dwar in-nuqqas fil-kwalita tal-ħajja għar-residenti tal-madwar.
Semmew li bil-proġett iż-żona ta’ Paceville issa se tinvadi l-akwati ta’ Pembroke u s-Swieqi u se tkun ġenerata attività kummerċjali f’żona residenzjali.
